Jambyl oblysynda negizgi kapıtalǵa tartylǵan ınvestıtsııalar 5.9 paıyzǵa ósti - ákim

TARAZ. QazAqparat - Búgin «100 naqty qadam» - Ult josparynyń óńirlik deńgeıdegi oryndalýyna arnalǵan brıfıngte Jambyl oblysyna ákimi Kárim Kókirekbaev ınvestıtsııanyń jańa kózderin tartý boıynsha atqarylyp jatqan jumystar jaıynda aıtyp berdi.

Onyń sózine qaraǵanda, oblysta Investorlardy tartý jónindegi keńes quryldy. «2015 jyldyń qorytyndysy boıynsha negizgi kapıtalǵa salynǵan ınvestıtsııalardyń jalpy kólemi 227 mlrd. teńgeni qurady. 2014 jylmen salystyrǵanda 5,9 paıyz deńgeıinde ósim bar»,-dedi ákim.

Atap aıtqanda, ınvestıtsııa kózderiniń basym bóligi sharýashylyq sýbektilerine tıesili, ıaǵnı 40,8 paıyzdy qamtyp otyr. Al zaemdyq qarjy -36,5 paıyz deńgeıinde.

Negizgi kaptıtalǵa ınvestıtsııalardyń eleýli bóligi kólik jáne qoıma, elektr únemdeý, gaz jetkizý sekildi salalarǵa tıesili bolyp otyr.

Ákimniń aıtýynsha, 2015 jyly negizgi kapıtalǵa salynǵan syrtqy ınvestıtsııalardyń kólemi 82,6 mlrd. teńgeni qurady nemese  ınvestıtsııanyń jalpy úlesinde 36,5 paıyzy. 2014 jylmen salystyrǵanda syrtqy ınvestıtsııalar kólemi 17,1 paıyzǵa kemidi. Onyń deńgeıiniń azaıýy birqatar iri ınvestıtsııalyq jobalardyń qurylysy boıynsha jumystardyń aıaqtalýymen, sondaı-aq tikeleı shetel ınvestıtsııalarynyń álemdik aǵymynyń keri qarqynymen túsindirilýde.

Búginde óńirde ınvestıtsııalyq jobalar 12 elden kelgen shetel ınvestorlarynyń qatysýymen júzege asyrylýda.