Jambyl oblysynda monshada tútinge ýlanǵan tórt bala aýrýhanaǵa tústi
TARAZ. QazAqparat – Jambyl oblysynda 4 bala monshaǵa shomylý kezinde tútinge ýlanyp, aýrýhanaǵa tústi,- dep habarlaıdy QazAqparat tilshisi.
Bıylǵy jyldyń 6 jeltoqsanynda saǵat 22.10-da kómirmen janatyn monshadaǵy jylytý peshiniń aqaýynan tórt bala tútinge ýlanyp, aýrýhanaǵa tústi. Oǵan peshtegi sańylaýdyń jáne tútin qubyrynyń tazartylmaǵandyǵy sebep bolǵan.
«Jambyl oblysy, Jambyl aýdany, Jalpaqtóbe aýylyndaǵy jeke turǵyn úıdiń monshasynda shomylý kezinde ýly gazben ýlaný saldarynan 2013, 2015, 2016, 2019 jyldary týǵan balalar ortasha dárejedegi ýlaný jaǵdaıymen aýrýhanaǵa tústi. Jalpy mundaı ýlaný oqıǵalary kóbinese gaz ónimderi tolyq janbaǵan jaǵdaıda paıda bolǵan gazdyń adam aǵzasyna áseri saldarynan oryn alady»,-delingen oblystyq tótenshe jaǵdaılar departamentiniń baspasóz qyzmetiniń habarlamasynda.
Atalǵan departament mamandary eresekterge qaýipsizdik erejelerin barynsha saqtaýǵa, balalardy qaraýsyz qaldyrmaýǵa shaqyrady.
