Jambyl oblysynda monıtorıng toptarynyń jumysy kúsheıtiledi
TARAZ. QazAqparat – Ótken aıda Jambyl oblysynda koronavırýstyq ınfektsııanyń 60 jaǵdaıy tirkelgen desek, ol aldyńǵy aımen salystyrǵanda aýrýshańdyq deńgeıiniń 1,4 esege óskenin kórsetedi, - dep habarlaıdy QazAqparat tilshisi.
Bul týraly oblystyq jedel shtabtyń kezekti otyrysynda sanıtarlyq-epıdemıologııalyq qadaǵalaý departamenti basshysynyń mindetin atqarýshy Neılıa Mýlıkova habarlady.
«Jaǵdaılardyń kóbi Taraz qalasy, Shý jáne Baızaq, Qordaı aýdandarynda anyqtalǵan. 31 COVID-19 oshaqtarynda qorytyndy dezınfektsııalyq sharalar júrgizildi. Baılanysta bolǵan 230 adam úı karantınine oqshaýlandy», - dedi ol.
10 qazan men 6 qarasha aralyǵynda monıtorıngtik toptar 1328 reıdtik tekserister júrgizip, 9125 nysan qamtyldy. Karantındik rejımniń 530 buzylý deregi anyqtalyp, 17 852 840 teńgege 163 hattama toltyrylǵan.
«Baızaq, Shý, Talas, Sarysý aýdandary men Taraz qalasynyń mobıldi toptarynyń jumysyn jandandyrý qajet», - deıdi N.Mýlıkova.
Oblys ákimi Berdibek Saparbaev monıtorıngtik toptarǵa turǵyndar men kásipkerlik sýbektileriniń shekteý jáne karantındik sharalardyń saqtalýyna baqylaý júrgizý jumystaryn kúsheıtýdi tapsyrdy.
«Oblys ortalyǵyndaǵy toptar úsh myńnan astam nysandy tekserip, tek 174 buzýshylyqty anyqtaǵan. Osy ýaqytqa deıin tek 60 materıal kelip túsken. Keıbir aýdandardaǵy jaǵdaı da osyǵan uqsas. Kóptegen reıdtik tekseristerden nátıje joq», - dedi oblys ákimi.
Polıtsııa departamentiniń bastyǵy Janat Súleımenov taýarlar men qyzmetterdiń sapasy men qaýipsizdigin baqylaý departamentiniń qyzmetkerlerine atalǵan reıdttik sharalarǵa qatysýǵa shaqyrdy. Óz kezeginde Neılıa Mýlıkova aýdandardaǵy barlyq vedomstvolardyń jedel ózara is-qımylyn uıymdastyrý úshin úılestirý ortalyqtaryn qurýdy usyndy.
Syrttan tasymaldanatyn jaǵdaılardyń kóbeıýine baılanysty memlekettik shekara arqyly ótkizý pýnktterinde sanıtarlyq-epıdemıologııalyq baqylaý kúsheıtildi. Oblys ákimi epıdemıologııalyq jaǵdaı kúrdelene túsken jaǵdaıda, oblystyń kireberisterine sanıtarlyq posttar ornatylatynyn atap ótti.
Densaýlyq saqtaý basqarmasynyń basshysy Áset Qalıev turǵyndardy tumaýǵa qarsy vaktsınatsııalaý barysy týraly baıandady. Búgingi kúni 345 myńnan astam adam vaktsınatsııadan ótken desek, halyqty qamtý kórsetkishi 30 paıyzdy quraıdy.
«Kadr máselesi áli de ózekti kúıinde. Bul baǵytta salalyq basqarma S.D.Asfendııarov atyndaǵy Ulttyq medıtsınalyq ýnıversıtetimen tyǵyz yntymaqtastyq ornatý qajet», - dedi oblys ákimi.
Ol aýrýdyń yqtımal tolqynyna medıtsınalyq qyzmetterdiń tolyq daıyndyǵyn qamtamasyz etýdi tapsyrdy.
«Aýdandarda jedel járdem qyzmeti oblystyq stantsııaǵa emes, aýdandyq aýrýhanalarǵa baǵynýy tıis. Medıtsınalyq brıgadalar patsıentke múmkindiginshe tezirek baryp, jedel kómek kórsetýi kerek», - dedi oblys ákimi. Tıisti Qaýlyny óńirlik jedel shtab shyǵarady.
Basqosý sońynda Berdibek Saparbaev sanıtarlyq normalar men shekteý sharalaryn saqtaý boıynsha turǵyndarǵa júrgiziletin túsindirý jumystarynyń mańyzdylyǵyn eske saldy.
