Jambyl oblysynda «Merki ónimderi» óndiristik kooperatıvi quryldy
ASTANA. QazAqparat - Jambyl oblysynda sút klasterin damytý sondaı-aq, kooperatıvterge shaǵyn sharýashylyqtardy biriktirý maqsatynda Jańazelandııalyq «Fonterra» jáne Danııalyq «Arla» baǵdarlamary boıynsha Merki aýdanynda quramyna 42 sharýashylyq birikken «Merki ónimderi» óndiristik kooperatıvi quryldy.
Bul týraly óńirlik kommýnıkatsııalar qyzmetinde ótken brıfıngte Jambyl oblysy ákimdiginiń aýyl sharýashylyǵy basqarmasy basshysynyń orynbasary Erkebulan Anabekov málim etti.
Onyń sózinshe, aldaǵy ýaqytta óndiristik kooperatıv tóńireginde 70-ten 200 basqa deıin asyl tuqymdy saýyn sıyry bar sút-taýarly fermalary qurylatyn bolady. Kooperatıv olardyń tóńiregindegi sút óndirýshilerdi, mal azyǵyn daıyndaýshylardy uıymdastyra otyryp, daıyn ónimdi ótkerý jumystarymen aınalysady.
Bul maqsatta sút baǵytyndaǵy 1000 bas asyl tuqymdy MІQ malyn satyp alýdy qarjylandyratyn shaǵyn nesıe mekemesi quryldy.Qazirgi ýaqytta kúnine qýattylyǵy 50 tonnaǵa deıin sútti qaıta óńdeý zaýytynyń qurylysyna jer bólinip, jobalyq smetalyq qujattardy daıyndaý jumystary júrgizilýde.
