Jambyl oblysynda menıngıt jaǵdaıy tirkelgen joq
TARAZ. QazAqparat - Jambyl oblystyq qoǵamdyq densaýlyq saqtaý departamenti óńirde menıngıt juqpasyna qatysty alańdaýǵa negiz joq ekenin málim etti, dep habarlaıdy QazAqparat tilshisi.
«Qazirgi tańda bizde bári tynysh. Menıngıtke shaldyǵý jaǵdaıy qańtar aıynda tirkeldi. 19 jastaǵy stýdent naýqastanyp, ýaqtyly dárigerge qaraldy. Juqpaly aýrýlar aýrýhanasynda em qabyldap, saýyǵyp ketti. Onymen baılanysqa túsken adamdardyń bul ınfektsııany juqtyrmaǵany anyqtaldy», - dedi QazAqparat tilshisine Jambyl oblystyq qoǵamdyq densaýlyq saqtaý departamentiniń basshysy Berik Jarqymbekov.
Berik Jarqymbekovtiń aıtýynsha, oblysta menıngokokk ınfektsııasyna qarsy belsendi profılaktıkalyq jumystar júrgizilip jatyr.
«Kásiporyndardy aralap, aqparattyq jumystar júrgizýdemiz. Turǵyndarǵa aýrýdyń profılaktıkasy týraly habar taratyp jatyrmyz. Dárigerler atalǵan indetti alǵashqy belgilerine qarap birden anyqtaı alady. Bastysy - ýaqtyly dárigerge qaralý. Sonda ǵana ony emdeýge bolady. Bizdiń emdeý mekemlerimizde menıngıtke shaldyqqandarǵa alǵashqy kómek kórsetýdiń naqty algorıtmi jasalǵan», - dep túsindirdi ol.
Jambyl oblystyq qoǵamdyq densaýlyq saqtaý departamenti basshylsynyń usynymy boıynsha, menıngokokk ınfektsııasyn juqtyryp almaý úshin belgili bir profılaktıkalyq sharalardy qoldaný qajet.
«Eń aldymen, medıtsınalyq maska rejımin saqtaý kerek. Taza aýada serýendep, kúnniń kózine jıi shyǵý qajet. Adamdar kóp jınalatyn is-sharalarǵa azyraq barǵan jón. Profılaktıkalyq sharalar retinde úıdi nemese ǵımaratty ylǵaldy tazalap, jeldetý kerek. Salaýatty ómir saltyn ustanyp, aǵzamyzdyń ımmýnıtetin kóterýge tıispiz», - dedi Berik Jarqymbekov.
