Jambyl oblysynda memlekettik tildi úıretetin mobıldik qosymsha iske qosyldy

TARAZ. QazAqparat – Jambyl oblysynda memlekettik tildi óz betinshe qarapaıym deńgeıde úırenýge arnalǵan 16 sabaqtan turatyn «QazOnline» mobıldik qosymshasy ázirlenip, iske qosyldy, dep habarlaıdy QazAqparat tilshisi.

Jambyl oblysynda 2020 jyly eresek toptarda memlekettik tildi oqytý kýrstarynyń sany artty. Jyl ishinde 2 232 jambyldyq tegin kýrstardan ótip, ótken jylmen salystyrǵanda 767 adamǵa kóbeıdi. Jyl sońyna deıin barlyǵy 3000 adam qamtylmaq. Bul týraly oblystyq tilderdi damytý basqarmasynyń baspasóz qyzmeti habarlady.

«Arnaıy ázirlenip, iske qosylǵan«QazOnline» mobıldik qosymshasy Memlekettik tildi óz betinshe qarapaıym deńgeıde úırenýge arnalǵan 16 sabaqtan turady. Ony tilderdi oqytý ortalyǵy daıyndaǵan. Qosymshany kez kelgen aýyl, qala turǵyny «Play Market» arqyly uıaly telefonyna júktep alyp, paıdalanýyna bolady. Tegin programma arqyly ár adamnyń ózi jospar qura otyryp, tildi meńgerýine múmkindigi bar. Qosymsha avtorlary qoldaný kezinde esh qıyndyq bolmaıdy dep sendirýde. Az ýaqyt ishinde kúndelikti ómirde qoldanylatyn aýyzsha sóıleý tili men sóz tirkesterin meńgerýge, sóılem quraýǵa, qarapaıym deńgeıdegi jazý daǵdylaryn úırenýge bolady eken. Qosymshada sondaı-aq, ózin-ózi tekserý bólimi de bar. Ár sabaqty qanshalyqty meńgergeni jóninde baǵalaý júıesi qarastyrylǵan»,-delingen habarlamada.

Sondaı-aq, etnos ókilderi tyǵyz shoǵyrlanǵan eldi mekenderde qazaq tilinde tildesý arqyly meńgertý, qazaq tilinde oıyn erkin jetkize bilýge jaǵdaı jasaý maqsatynda TedX formatynda «SÓILE» klýbtary jumys isteýde. Jyl ishinde «SOILE» klýbtyń 55 otyrysy ótip, 1000-nan asa ózge etnos ókilderi tildik ortaǵa tartyldy.

Qazirgi tańda tilderdi damytý basqarmasynyń qyzmetkerleri aýdandardy aralap, qosymsha jumysyn túsindirýge baǵyttalǵan jumystardy atqarýda. Esepti aralyqta memlekettik tildi damytýǵa baǵyttalǵan 200-ge jýyq qoǵamdyq-mańyzy bar, sharalar ótkizilip, 50 000-nan astam adam qamtyldy.

Áleýmettik joba aıasynda til janashyrlarynan turatyn «Qoǵamdyq til ınspektsııasy» qurylyp, jumys jurgizýde.

Til ınspektsııasy 10 aýdan men Taraz qalasyndaǵy kórneki aqparat quraldarynda memlekettik tildi qoldaný barysyna monıtorıng júrgizdi. 1021 nysan tekserilip, 538-den astam qatelikter anyqtalǵan.