Jambyl oblysynda memlekettik baǵdarlama aıasynda eki jańa mektep ashyldy
TARAZ. QazAqparat - Jambyldyq 2 400 oqýshy bıylǵy jyly jańa mektepterde bilim alatyn bolady, dep habarlaıdy «QazAqparat» Jambyl oblysy ákimdiginiń baspasóz qyzmetine silteme jasap.
Búgin Tarazda eki jańa mektep ashyldy. Olardyń biri «Saltanat» shaǵyn aýdanyndaǵy №30 orta mektep bolsa, ekinshisi «Sholdala» eldi mekeninde ornalasqan 1 200 balaǵa arnalǵan orta mektep. Sonymen qatar oblys ortalyǵyndaǵy kóne mektepterdiń biri - №24 mektep-gımnazııasyna qosymsha salynǵan ǵımarat iske qosyldy. Osynyń barlyǵy balalardyń mekteptegi tyǵyzdyq máselesiniń sheshilýine negiz boldy.
Atalǵan ysandardyń barlyǵy 2015-2019 jyldardy qamtıtyn ınfraqurylymdy damytýǵa baǵyttalǵan «Nurly jol» baǵdarlamasynyń aıasynda salyndy, dep naqtylady ákimdik ókilderi. №30 mektep-gımnazııasynyń saltanatty ashylý rásimi oblys ákimi Kárim Kókirekbaevtyń qatysýymen ótti. Buryn balalar apatty jaǵdaıda turǵan ǵımaratta bilim alyp kelgen bolsa, endi olar jalpy aýmaǵy 9 myń sharshy metrdi alyp jatqan jańa da keń synyptarda oqıtyn bolady.
Ǵımarattyń jobalyq quny 1,3 mlrd teńge. Ol QR Ulttyq qory tarapynan qarjylandyryldy. №30 orta mekteptiń 46 oqý kabıneti zamanaýı qurylǵylarmen qamtamasyz etildi. Akt zalyna 350 adam syıady. Ashanasynda bir mezgilde 150 bala tamaqtana alady. Sportzalynda jańa sportpen aınalysýǵa arnalǵan qurylǵylar bar. Bul mektepte 80 pedagog jumys isteıdi.
Jambyl oblystyq qurylys, jolaýshylar kóligi jáne avtomobıl joldary basqarmasynyń derekteri boıynsha, bıylǵy jyly iske qosylǵan 20 bilim mekemesiniń 14-i mektep, 3-ýi mektepterdiń janynan salynǵan qurylys nysandary, bir jańartylǵan ǵımarat, kolledjdiń qosymsha ǵımaraty men kámeletke tolmaǵandarǵa arnalǵan beıimdeý ortalyǵy bar.
Jańa oqý jylynda Jambyl oblysynda 451 mektep jumys isteıdi. Onda 214 myń bala bilim alady.
