Jambyl oblysynda mekteptiń akt zalynyń tóbesi opyrylyp tústi
24 qańtar kúni túngi saǵat 1.00 shamasynda Moıynqum aýdanyndaǵy Myńaral aýylynda ornalasqan Kenesary Qasymov atyndaǵy orta mekteptiń akt zalynyń tóbesin tirep turǵan beton qulaǵan, artynsha tóbesi opyrylǵan.
«480 oryndyq bul mektep 1972 jyly kirpishten salynǵan. Búginde bilim oshaǵynda barlyǵy 175 oqýshy bilim alýda, shaǵyn ortalyqta – 48 bala tárbıelenýde. Mektepte barlyǵy 34 pedagog jumys isteıdi. Ábúıir bolǵanda, oqıǵa saldarynan zardap shekken adamdar joq. Oryn alǵan jaǵdaıǵa baılanysty bilim mekemesindegi oqý ýaqytsha onlaın rejımine kóshirildi», - dep jaýap berdi Jambyl oblystyq bilim basqarmasynyń basshysy Meıirhan Ómirbek QazAqparat tilshisiniń saýalyna.
Onyń sózine qaraǵanda, bilim basqarmasy basshysy Moıynqum aýdanynyń ákimi jáne qurylys mamandarymen birge atalǵan mektepte bolyp, jaǵdaımen tanysyp, zerdeleý jumystaryn júrgizdi. Nátıjesinde atalǵan mektepke obektilik aýqymdaǵy tótenshe jaǵdaı jarııalandy.
«Qazirgi tańda, oryn alǵan jaǵdaıǵa baılanysty «QazQSǴZI» AQ OQF-men kelisim shart jasaldy. Mekteptiń jaǵdaıyna tolyq taldaý jasalyp, qorytyndysy kútilýde. Qorytyndyǵa sáıkes, tıisti sheshimder qabyldanatyn bolady.
2018 jyly mektep ǵımaratynyń qazandyǵy syrtqa shyǵarylyp, rekonstrýktsııalyq jóndeý jumystary júrgizilgen», - dedi jergilikti ákimdik ókili.
