Jambyl oblysynda mektep oqýshylarynyń sany artty
TARAZ. QazAqparat - Bıylǵy oqý jylynda jambyldyq mektep oqýshylary túrli ıntellektýaldyq jarystardan 70-ke jýyq medal alǵan. Bul jóninde Jambyl oblysy ákimdiginiń Bilim berý basqarmasy basshysynyń orynbasary Jámılá Bekbatyrova habarlady.
Onyń aıtýynsha, oblys oqýshylary 2015 jylǵy oqý jylynda respýblıkalyq, dúnıejúzilik, halyqaralyq olımpıadalar men ǵylymı jarystarda 68 medal alǵan.
«Oblys komandasy 5-shi jyl qatarynan respýblıkalyq pán olımpıadasynyń qorytyndysy boıynsha komandalyq 1-shi oryndy, 4-shi jyl qatarynan respýblıkalyq ǵylymı jarystardyń qorytyndysy boıynsha komandalyq birinshi oryndy ıelenýi - árıne, oblysymyz úshin úlken abyroı, ári daryndy shákirtterdiń El Táýelsizdiginiń 25 jyldyǵyna jasaǵan úlken tartýy boldy», - dedi J.Bekbatyrova.
Spıker bilim deńgeıiniń basty kórsetkishteriniń biri UBT nátıjesi ekenin atap ótti. Bıylǵy jyly júrgizilgen júıeli jumystardyń nátıjesinde «Altyn belgige» usynylǵan úmitkerlerdiń basym bóliginiń óz bilimderin dáleldep, 120-dan joǵary ball alǵan bitirýshiler úlesi artty, UBT nátıjesi boıynsha tómen nátıje kórsetken mektepter sany kemigen.
Jańa oqý jylynda oblystaǵy 450 mektepke 210 myńnan asa oqýshy keledi dep josparlanýda, bul ótken jylmen salystyrǵanda 11 myńǵa kóbirek. Onyń 26379 oqýshysy 1-synypqa qabyldanady.
