Jambyl oblysynda medıtsına mamandary tapshy
TARAZ. QazAqparat – Jambyl oblysynda densaýlyq saqtaý salasynyń mamandary tapshy, dep habarlaıdy QazAqparat tilshisi.
Óńirlik Densaýlyq saqtaý basqarmasynyń basshysy Marat Jumanqulov densaýlyq saqtaý salasyndaǵy medıtsınalyq qyzmettiń sapasyna kadr tapshylyǵy tikeleı áser etetinin jetkizdi.
«Mekemelerdiń tapsyrysy boıynsha 322 bos oryn jarııalanǵan bolatyn. Ony toltyrý maqsatynda respýblıkadan 185 jas maman joldanǵanymen, áli de 130-dan astam maman qajet. Basqarma muny óz betimen keletin oqý oryndarynyń túlekterimen tolyqtyrýdy josparlap otyr», - deıdi M.Jamanqulov.
Basqarma tarapynan oblysqa qandaı mamandar qajettigi zerdelenip, nátıjesinde akýsher-gınekolog, anestezıolog-reanımatolog, neonatolog mamandarynyń tapshylyǵy anyqtalǵan. Osy oraıda oblystyq bıýdjetten 8,7 mıllıon teńge bólinip, 9 mamandy oqytý josparlanýda.
Mamandar tartý úshin áleýmettik jaǵdaıdyń jasalý mańyzy da zor. Bul maqsatta bıyl jas mamandarǵa 100 myń - 800 myń teńgege deıin áleýmettik kómek túrin kórsetý josparlanǵan. Sondaı-aq, turǵyn úı satyp alý nemese salý úshin 1500 AEK aspaıtyn nesıe, 100 AEK-ke teń somada kóterme járdemaqy kózdelgen.
Sondaı-aq, aıta ketý kerek, byltyr óńirdegi medıtsınalyq nysandardy jabdyqtaýǵa bıýdjetten 2,3 mıllıard teńge bólinip, 900-den astam apparat satyp alynǵan. Al bıyl 1,7 mıllıard teńgege 300-den asa medıtsınalyq tehnıka alynsa, aldaǵy eki jylda 1,1 mıllıard teńgeden asa somaǵa 321 birlik tehnıka alý josparlanǵan. Osylaısha, Memleket basshysynyń jergilikti jerlerdegi emhanalardy 100 paıyz medıtsınalyq qural-jabdyqtarmen qamtý tapsyrmasyn oryndaý kózdelip otyr.
