Jambyl oblysynda medıtsına qyzmetkerlerine arnalǵan úı salynady
TARAZ. QazAqparat – Jambyl oblysynda keler jyly medıtsına qyzmetkerlerine arnalyp qyzmettik úı boı kótermek. Bul týraly oblys ákimi Berdibek Saparbaev densaýlyq saqtaý salasy mamandarymen kezdesý barysynda aıtty, dep habarlaıdy QazAqparat tilshisi.
«Basqa óńirlerdiń tájirıbesin negizge ala otyryp, muǵalimder men dárigerlerdi
turǵyn úımen qamtamasyz etýdi júzege asyramyz. Memleket basshysynyń
tapsyrmasyna sáıkes medıtsına qyzmetkerleriniń jalaqysyn kezeń - kezeńimen
arttyrý josparlanýda», - dedi óńir basshysy.
Sondaı-aq, Berdibek Saparbaevtyń aıtýynsha, keler jyly onkologııalyq ortalyq ta ashylmaq. Onyń janynan memlekettik-jekeshelik áriptestik aıasynda kópsalaly aýrýhana boı kóteredi.
«Jambyldyqtar basqa qalalar men elderge sabylmaı, barlyq medıtsınalyq
qyzmetterge osy jerde qol jetkizýi tıis», - dedi oblys ákimi.
Ol barlyq qabyldanyp jatqan qoldaý sharalaryna qaramastan, densaýlyq saqtaý salasynyń qazirgi jaı-kúıi kóńil kónshitpeıtinin basa aıtty.
«Jambyldyqtar arasynda qoǵamdyq saýalnamalar únemi ótkizilip turady.
Negizinen olar dárigerlerge, mektep dırektorlaryna, azyq-túliktiń qymbattaýyna,
kommýnaldyq qyzmetterdiń jumysyna qatysty jıi shaǵymdanady. Turǵyndar maǵan áleýmettik jelilerde dárigerler ýaqtyly medıtsınalyq kómek kórsetpeıtinin aıtyp, júginýde. Bul oraıdaǵy basty másele, árıne – bıýrokratııa.
Osylardan keıin medıtsınany tsıfrlandyrý damyp jatyr degenge sený qıyn», - dedi oblys ákimi bas dárigerlerge.
Ol árbir ótinishtiń arnaıy komıssııamen qaralatynyn eskertti. Kináliler jaýapkershilikke tartylmaq.
«Bas dáriger degen óz jumysyna jany ashıtyn, uıymdastyrýshylyq qabileti joǵary, tájirıbeli basshy bolýy kerek. Dárigerlerdiń basty mindeti – óz antyna adal bolýy. Nelikten naýqastar sizdiń artyńyzdan júgirýi kerek? Memleket basshysynyń «Halyq únine qulaq asatyn memleket» tujyrymdamasy dárigerlerge de qatysty», - dep túıindedi Berdibek Saparbaev.
