Jambyl oblysynda mas júrgizýshi velosıpedshini qaǵyp óltirdi
TARAZ. QazAqparat – Jambyl oblysynda mas júrgizýshi velosıped aıdap bara jatqan 20 jastaǵy jigitti qaǵyp óltirdi, dep habarlaıdy QazAqparat tilshisi.
Jambyl oblysy Shaıqoryq aýylynyń 37 jastaǵy turǵyny buǵan deıin kólikti mas kúıinde basqarǵany úshin sot sheshimimen júrgizýshi kýáliginen aıyrylǵan bolatyn. Soǵan qaramastan ishimdik iship, «Aýdı-80» avtokóliginiń rýline qaıta otyrǵan ol, 20 jastaǵy velosıpedshini mert qyldy.
Jol-kólik oqıǵasy saldarynan velosıpedshi alǵan dene jaraqattarynan oqıǵa ornynda qaza boldy.
«Atalǵan derek boıynsha Jambyl aýdanynyń polıtsııa bólimimen QR Qylmystyq kodeksiniń 346-baby 5-bóligimen (kólik quraldaryn basqarý quqyǵynan aıyrylǵan jáne alkogoldik, esirtkilik mas kúıindegi adamnyń kólik quralyn basqarýy) sotqa deıingi tergeý óndirisi bastaldy. Kólik quralynyń júrgizýshisi sol kúni ustalyp, qamaýǵa alyndy», - dedi oblystyq Polıtsııa departamentiniń baspasóz qyzmetinen.
Qazirgi ýaqytta qylmystyq is boıynsha qajetti tergep-tekserý amaldary júrgizilip, tıisti sot saraptamalary taǵaıyndaldy.
Bul derek boıynsha belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, 7-9 jylǵa deıingi merzimge bas bostandyǵynan aıyrý jazasy belgilengen.
