Jambyl oblysynda «qyzyl» syzyqtan asqan 85 nysan súrildi
Sáýlet jáne qala qurylysy basqarmasynyń basshysy Arman Ábdeshov ótken jyly oblys ákiminiń tapsyrmasy boıynsha kommertsııalyq kásiporyndar qurylysynyń zańdylyǵyna tekserýler júrgizilgenin jetkizdi. Tekserý barysynda barlyǵy 123 nysannyń «qyzyl» syzyq talabyn buzǵandyǵy anyqtalǵan desek, búginge deıin onyń 85-i súrilgen.
«Qalǵan 38 nysanǵa qatysty aýdandyq ákimdikter tıisti shara qoldanbaı otyr», - dedi Arman Ábdeshov.
Bıylǵy jyl basynan beri «qyzyl» syzyqtan asqan taǵy 80 nysan anyqtalǵan.
«Aýdan ákimderi qurylys normalary men erejelerin buzýdy joıý boıynsha naqty sharalar qabyldaýǵa qulyqsyz. «Qyzyl» syzyqqa qatysty másele birinshi ret talqylanyp otyrǵan joq. Zańsyz salynǵan nysandardy buzyp jatqanymyzben, myna jaqtan taǵy da zańsyz jańa nysandar boı kóterýde. Demek, jaýapty organdar men ákimdikter birlesip jumys isteı almaı otyr. Bári jaýapkershilikti bir-birine ysyra salýǵa daıyn. Resmı hattar joldap qoıyp, jaýabyn kútip otyrýǵa úırengensizder. Al, naqty jumysty bastaýǵa eshkim asyǵar emes. Bul bıýrokratııa qashan aıaqtalady?» – dep oblys ákimi Berdibek Saparbaev sylbyr jumystardy synǵa aldy.
Aımaq basshysy qurylys salasyndaǵy buzýshylyqtardy qysqa merzimde joıý boıynsha arnaıy is-sharalar kestesin ázirleýdi tapsyrdy. Taraz qalasy men aýdan ákimdikteri salynyp jatqan nysandardyń ıelerinde tıisti ruqsat qujattarynyń bar-joqtyǵyn zerdelep, der kezinde qajetti sharalardy qabyldaýy tıis.
Memlekettik sáýlet-qurylys baqylaý basqarmasyna da qurylys jumystarynyń sapasyn qadaǵalaý tapsyryldy.
Sonymen qatar, basqosýda sáýlet jáne qala qurylysy, jer qatynastary salasynda kórsetiletin 11 memlekettik qyzmet toptastyrylǵan arnaıy geoportal qurý máselesi de saralandy.