Jambyl oblysynda Qytaıdan zańsyz kóshi-qon uıymdastyrǵandar sottaldy

ASTANA. QazAqparat - Jambyl oblysynyń aýmaǵynda uzaq ýaqyt boıy qytaılyq azamattardyń zańsyz kóshi-qonyn uıymdastyryp kelgen adamdar toby ustaldy. Bul týraly QR Ulttyq qaýipsizdik komıtetinen málim etti, dep habarlaıdy QazAqparat.

Qytaıdan mıgranttardyń zańsyz arnasyn Taraz qalalyq kóshi-qon polıtsııasy bóliminiń qyzmetkerleri uıymdastyrǵan. Atap aıtqanda, olar - bólimniń burynǵy basshysy A.Zeıdalıev jáne onyń orynbasary B.Naýryzbaev. Sondaı-aq QHR týmasy Ý. Sılambek «deldal» retinde sybaılas bolǵan.

«Kórsetilgen adamdar toby jalǵan qujattardy qoldana otyryp, QHR-dyń 170-ten astam azamatyn Jambyl oblysyna tirkegen. Osylaısha, olarǵa Qazaqstanda kedergisiz turýǵa quqyq beretin qujattar bergen», - delingen habarlamada.

2019 jylǵy 5 naýryzda Tarazdyń № 2 qalalyq sotynda qylmystyq is boıynsha úkim jarııalandy.

A. Zeıdalıev QR QK-niń 361-baby 4.4 3-t. («Aýyr saldarlarǵa ákep soqqan laýazymdyq ýákilettilikti teris paıdalaný»), 394-baby 4.2 («Adamdar tobynyń aldyn ala sóz baılasyp zańsyz kóshi-qon uıymdastyrýy») boıynsha kináli dep tanyldy. Ol 4 jyl 6 aıǵa bas bostandyǵynan aıyryldy. Jazasyn ortasha qaýipsizdiktegi túzeý mekemesinde óteıdi.

B. Naýryzbaev QR QK-niń 361-baby 4-bóligi 3-tarmaǵy, 394-baby 2-bóligi boıynsha kináli dep tanyldy. Ony 3 jyl 6 aıǵa bas bostandyǵynan aıyrýǵa úkim etildi. Jazasyn ortasha qaýipsizdiktegi túzeý mekemesinde óteıdi.

Ý. Sılambek QR QK 394-baby 2-bóligi boıynsha kináli dep tanylyp, 4 jylǵa ortasha qaýipsizdiktegi túzeý mekmesinde jazasyn óteýmen bas bostandyǵynan aıyryldy.

Sottalǵan B. Naýryzbaev pen Ý. Sılambek úkim jarııalanǵannan keıin sot zalynda qamaýǵa alyndy. A. Zeıdalıevke qatysty «qamaýǵa alý» túrindegi bultartpaý sharasy buǵan deıin qoldanylǵan bolatyn.

Qazirgi ýaqytta QHR azamattaryna berilgen QR aýmaǵynda turýǵa qatysty qujattardyń kúshin joıý máselesi sheshilýde.