Jambyl oblysynda qysta jol tazalaýǵa 130 tehnıka jumyldyrylady
TARAZ. QazAqparat - Jambyl oblysynda jol tazalaýǵa 130 tehnıka jumyldyrylady. Bul týraly jáne oblysta qyz mezgilindegi avtomobıl joldarynyń jumysy týraly Jambyl oblystyq Tótenshe jaǵdaılar departamentiniń ókilderi baıandady, dep habarlaıdy QazAqparat.
Jambyl oblystyq Tótenshe jaǵdaılar departamentiniń tótenshe jaǵdaılardy eskertý bóliminiń jetekshisi Omar Tákeevtiń aıtýynsha, oblys trassalarynda jolaýshylar men júrgizýshilerge arnalǵan 16 jylytý orny bar.
«Mundaı beketterdiń 10-y respýblıkalyq mańyzdaǵy baǵyttarda ornalasqan, taǵy 6-ýy oblystyq joldarda. Buǵan qosymsha jylytý orny retinde jol boıynda ornalasqan qoǵamdyq tamaqtaný oryndary men mektep, meshit sııaqty nysandar da paıdalanylady. Tótenshe jaǵdaılar departamentine qarasty barlyq bólimshelerdegi qyzmetkerler qys mezgilinde qalaı jumys isteý kerektigine, tıisti tehnıkalar men quraldardy qalaı paıdalaný qajettigine úıretildi»,-dedi ol.
O.Tákeev ótken jyly qys mezgilinde óńirdegi avtojoldarda 200-den astam adam evakýatsııalanyp, 60-tan astam kólik qar qursaýynan shyǵarylǵandyǵyn aıta ketti.
«Jylda qar qalyń túsetin jáne boran bolyp turatyn aımaqtarda kommýnaldyq qyzmetterdiń kezekshiligi uıymdastyrylady. Jol polıtsııasy ınspektorlary da ózderine bólingen aımaqtardy sholyp júredi»,-dedi jetekshi.
Onyń aıtýynsha, búgingi tańda oblystaǵy avtomagıstraldardy tazalaý jumystaryna 133 tehnıka daıyndyqqa keltirilgen. Qaýipti jol aımaqtaryna arnaıy adamdar bekitilgen. Aýa raıy buzylǵan jaǵdaıda turǵyndarǵa eskertý jasaý júıesi daıyndaldy. Respýblıkalyq avtomagıstraldardyń boıyna 800-dan astam «Jyldamdyqty shekte», «Jol taıǵaq» degen sııaqty ýaqytsha belgiler ornatylǵan.
Esterińizge sala keteıik, Jambyl oblysy qys mezgilindegi jol qozǵalysy qaýipsizdigin qamtamasyz etýge ázirlik jasap jatqanyn habarlaǵan bolatynbyz. Óńirde qysta Jýaly aýdany joldarynda kólik qatynasy qıyndaıdy. Ásirese Shaqpaq jáne Kúıik asýlary qaýipti. Sondyqtan bul aýmaqqa basa kóńil bólinip otyr. Byltyr qar tazalaıtyn tehnıkanyń azdyǵynan birneshe ret respýblıkalyq mańyzy bar jol jabylyp, 15 eldi mekenmen baılanys úzilgen bolatyn. Saldarynan myńdaǵan kólik jolda qalǵan edi. Endi osyndaı jaǵdaıdyń aldyn alý maqsatynda oblysta 130 tehnıka daıyndalyp otyr.
