Jambyl oblysynda Qyrǵyzstannyń Talas jáne Shý oblystarynyń kúnderi ótti
«Kóne Taraz» etno-mádenı kesheninde qyrǵyz aýyl sharýashylyǵy taýar óndirýshileriniń jármeńkesi ótti. Kórmeni Jambyl oblysynyń ákimi Berdibek Saparbaev Qyrǵyzstan Prezıdentiniń Shý oblysyndaǵy ýákiletti ókili Erkin Tentıshev jáne Talas oblysyndaǵy ýákiletti ókili Baqytbek Narbekovpen birge aralady. Ónim túrlerimen tanysyp, satýshylarmen jáne tutynýshylardy áńgimege tartty.
«Qazaq men qyrǵyz – baýyrlas halyqtar. Bizdi kópǵasyrlyq ortaq tarıhymyz, berik dostyq pen tatý kórshilik qarym-qatynas baılanystyrady. Eki el arasyndaǵy birlikti odan ári nyǵaıta túsý – bizdiń ortaq mindetimiz. Ejelden kele jatqan dástúrli mádenı baılanysymyzdy jalǵastyrý qajet. Jaqynda ǵana Qyrǵyz Respýblıkasynyń Talas oblysynda ótken dástúrli «Uranym Manas» manasshylar festıvaline qatysyp qaıtqan bolatynbyz. Bishkekte uly aqyn Jambyl Jabaevtyń 175 jyldyǵyna arnalǵan is-sharalar uıymdastyryldy.
Búgin Sizder Taraz qalasynyń turǵyndaryna merekelik kóńil-kúı syıladyńyzdar. Bizdiń qarym-qatynasymyz budan ári de tereńdep, keńeıe beretinine senimdimin. Óńirler arasynda túrli salalarda, onyń ishinde mádenıet pen saýda-sattyqta ózara yntymaqtastyqtyra arttyramyz», - dedi Berdibek Saparbaev qonaqtarǵa.
E.Tentishev pen B.Narbekov qonaqjaılyq tanytqan jambyldyqtarǵa rızashylyǵyn bildirip, elder arasyndaǵy yntymaqtastyq qashannan úzilmeı kele jatqanyn, odan ári kúsheıte túsýge nıetti ekendigin atap ótti.
Qonaqtar 130,8 mıllıon teńgeniń 128,6 tonna azyq-túlik ónimin ákelgen. Onyń ishinde 21,7 tonna kartop, 19,1 tonna qyryqqabat, 15 tonna sábiz, 2 tonna pııaz, 30,1 tonna alma, 40 keli keptirilgen jemis jáne 0,5 tonna sút ónimderi bar. Kópjyldyq gúlderdiń suryptary, aǵash kóshetteri de usynyldy.
«Úsh tonnadan astam kókónis, bir tonnadan astam kartop ákeldik. Kartoptyń kelisin 130 teńgeden ótkerdik. Barlyǵy derlik eki saǵatta satylyp ketti. Mundaı jármeńkeler biz úshin de tıimdi, sebebi ónimderimizdi deldalsyz tikeleı ótkizemiz», - deıdi qyrǵyzstandyq «Yntymaq» sharýa qojalyǵynyń jetekshisi Mádına Qalybaeva.
Jármeńkede azyq-túlikter naryqtaǵydan 10-20 paıyzǵa tómen baǵada satyldy.
Qyrǵyz Respýblıkasynyń shyǵarmashylyq ujymdarynyń kontserttik baǵdarlamasy sharanyń sánin asha tústi.
Qyrǵyz delegatsııasy óńirdegi «Super Pharm» JShS, kórkem gımnastıka jáne ústel tennısi sport keshenin, «Anaǵa taǵzym» ortalyǵy men «Tekturmas» etno-tarıhı keshenin aralap, tanysty.
