Jambyl oblysynda qylmys 27,5 paıyzǵa azaıdy
TARAZ. QazAqparat – Jambyl oblysynda qylmys 27,5 paıyzǵa azaıdy, dep habarlaıdy QazAqparat Polıtsııa departamentiniń baspasóz qyzmetine silteme jasap.
Bıylǵy jyly aqpan aıynda taǵaıyndalǵan Jambyl oblysy Polıtsııa departamentiniń basshysy Janat Súleımenov eki aı ýaqytta atqarylǵan jumystardy qorytyndylady. Sondaı-aq ol kún tártibindegi qaralatyn máselelerge de keńinen toqtalyp ótti. Eki aıdyń qorytyndysy boıynsha oblys aýmaǵynda qylmys sany ótken jyldyń osy kezeńimen salystyrǵanda 27,5 paıyzǵa azaıǵan. Atqarylyp jatqan is-sharalardyń nátıjesinde birqatar negizgi baǵyttar boıynsha oń kórsetkishterge qol jetkizildi.
«Atap aıtqanda, asa aýyr qylmystardyń ashylýy 18 paıyzǵa, kisi óltirý qylmysynyń ashylýy 88,9 paıyzdan 100 paıyzǵa, al kisi óltirýge oqtalý qylmysynyń ashylýy 100 paıyzǵa joǵarylaǵan. Sondaı-aq, qaraqshylyq qylmystarynyń tirkelýi 20 paıyzǵa tómendegen. Jalpy urlyqtardyń ashylý kórsetkishi 17,1 paıyzǵa, onyń ishinde páter urlyǵyn ashý 19 paıyzǵa joǵarylaǵan. Al, qoǵamdyq oryndarda jasalǵan qylmystar sany 29 paıyzǵa kemidi»,- dedi departament basshysy.
Sondaı-aq, júrgizilgen profılaktıkalyq jumystardyń nátıjesinde kámeletke tolmaǵandardyń qylmystary 53,8 paıyzǵa, mas kúıinde jasalǵan qylmystardyń 41,9 paıyzǵa tómendeýine qol jetkizildi. Oblys boıynsha aýyr qylmystardyń ashylý paıyzy 79,2-ni qurady.
Keńes barysynda departament basshysy qalalyq jáne aýdandyq polıtsııa bólimderiniń basshylaryn tyńdady. J.Súleımenov statıstıka úshin emes, halyq úshin jumys jasaý kerektigine erekshe toqtalyp ótti. Sonymen qatar keıbir basshylarǵa memlekettik tildi meńgerý kerektigi týraly eskertti.
Atqarylyp jatqan jumystar men oblystaǵy jedel jaǵdaıǵa oń baǵa bergen PD basshysy áli de kezdesetin kóptegen kemshilikterdi joıý boıynsha naqty tapsyrmalar berdi.
