Jambyl oblysynda kvazımemlekettik sektordy ońtaılandyrý máselesi talqylandy
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken keńeste kommýnaldyq menshikti tıimdi basqarý men ıelik etýge baılanysty máseleler talqylandy. Onda osy saladaǵy jumystar men kemshilikter atap ótildi, - dep habarlaıdy QazAqparat oblys ákimdiginiń resmı saıtyna silteme jasap.
Búginde úkimettik deńgeıde memlekettik uıymdar sanyn qysqartý, olardy básekelestik ortaǵa berý jáne ákimshilik shyǵyndardy azaıtý mindeti qoıylyp otyrǵany belgili. blysta kvazımemlekettik sektor sýbektilerin ońtaılandyrý, qaıta qurý jáne taratý boıynsha jumys eki jyl buryn bastaldy.
Otyrysta qarjy basqarmasynyń basshysy Roza Isaeva habarlaǵandaı, 2018 jyly memlekettik organdarǵa qarasty uıymdardy biriktirý jáne ońtaılandyrý arqyly 277 shtat birligi, al 2019 jyly taǵy 790 birlik qysqartylyp, bul óz kezeginde ákimshilik shyǵyndardy tıisinshe 210 jáne 252 mıllıon teńgege únemdeýge múmkindik bergen. Shtattardy qysqartý negizinen bos oryndar men qyzmetkerlerdiń mólsherlemeleri men fýnktsıonaldyq mindetterin biriktirý esebinen júzege asyrylǵan.
Qazirgi tańda oblystyń kommýnaldyq menshiginde sharýashylyq qyzmetimen aınalysatyn 939 komýnaldyq memlekettik mekeme, 309 memlekettik kommýnaldyq qazynalyq kásiporyn jáne 93 kásiporyn bar. Kvazımemlekettik sektor sýbektilerin básekelestik ortaǵa berý boıynsha jumys jalǵasýda. Aǵymdaǵy jyldyń basynda jeke menshikke 2 mlrd. teńgege 15 uıym satyldy, 12 uıym keıinnen satyp alý quqyǵymen senimgerlik basqarýǵa berildi, 7 uıym birigý jolymen joıyldy nemese qaıta uıymdastyryldy, 2 uıym taratylý ústinde.
Sonymen qatar, oblys ákimi kommýnaldyq múlikke ıelik etý qyzmeti boıynsha birqatar syn-eskertpeler aıtty. Eskertýlerdiń biri memlekettik qarajatqa salynǵan jańa nysandardyń qujattaryn rásimdeýge qatysty boldy. Oblys boıynsha 2016-2018 jyldary salynǵan 74 nysannyń áli kúnge deıin qujattary rásimdelmegen. Taraz qalasynda ondaı - 30, Qordaı aýdanynda - 11, Sarysý aýdanynda 7 nysan bar. Jergilikti turǵyndar úshin paıdalanýǵa bolatyn bos bólmeleri bar nysandar men ǵımarattar da kezdesedi. Al, Taraz qalasynda jańa úılerdegi 580 páterdiń ıesi tabylmaǵan.
- Bul máseleni jergilikti atqarýshy organdar sheshýi kerek, al qarjy basqarmasy qurylys, ekonomıka jáne bıýdjettik josparlaý basqarmalarymen birlesip osy baǵyttaǵy jumystardy úılestirýi kerek. Memleket qarajatyn tıimdi paıdalaný kerek, ol aınalymda bolýy tıis, - dedi B.Saparbaev.
Jıynda ǵımarattar men úı-jaılardy jalǵa berýge qatysty máseleler de qozǵaldy. Bul turǵydaǵy kóptegen kemshilikter bar desek, olardy joıý boıynsha tıisti salalyq vedomstvolarǵa tapsyrmalar júkteldi.
