Jambyl oblysynda qujatsyz dári-dármek tasymaldaǵan júk kóligi ustaldy

TARAZ. QazAqparat - Jambyl oblysynda ilespe qujatsyz tasymaldanǵan dárilik preparattar bar júk kóligi ustaldy, dep habarlaıdy QazAqparat Qarjy monıtorıngi komıtetiniń baspasóz qyzmetine silteme jasap.

Qarjy monıtorıngi komıtetiniń Jambyl oblysy boıynsha Ekonomıkalyq tergeý departamentiniń qyzmetkerleri oblystyń UQK ShQ qyzmetkerlerimen birlesip atqarǵan jedel-izdestirý sharalary barysynda Qordaı aýdanynyń «Qarasý» shekaralyq beketinde 29 jastaǵy qazaqstandyq basqarǵan júk kóligin ustady.

«Júkti joldaǵan fırma Qyrǵyz Respýblıkasynda tirkelgen, al qabyldaýshy – RF-nyń kásiporny. Tekseris barysynda kólikti júk salý bóliginde sáıkes qujattary bar halyq tutynatyn taýarlardan basqa taýarlyq-ilespe qujattarsyz tasymaldanǵan dári-dármekter anyqtaldy. Olardyń ishinde 20-dan astam túrli dárilik zattar (500 qaptamadan «Paratsetamol» jáne «Tsıtramon», 1 750 dana «Fanıgan», 240 qaptamadan «Spazmalgon» jáne «Sedalgın», 200 qaptama «Lıdokaın», 22 qorap «Tetratsıklın», 9 qorap «Mýkaltın jáne t.b.), 1 400-den astam termometr boldy», delingen habarlamada.

Atalǵan fakt boıynsha Qylmystyq kodekstiń 214-baby 1-bóligine sáıkes sotqa deıingi tergeý isi qozǵaldy.

«Odan basqa, reıd barysynda Taraz qalasyndaǵy dárihanalardyń birinde dárigerdiń dári qaǵazynsyz jáne joǵary baǵada dári preparattaryn satý faktisi anyqtaldy. Bul boıynsha materıal zań buzýshyny jaýapqa tartý úshin ókiletti organǵa joldandy», delingen habarlamada.