Jambyl oblysynda qus tumaýy boıynsha ahýal turaqty
Oblys ákimdiginiń resmı saıtynda málim etilgendeı, bıylǵy 23 qyrkúıekte Jýaly aýdanynyń Qaratas aýylynda úı qustary arasynda qus tumaýy anyqtaldy. Osyǵan oraı, Jýaly óńirlik ınspektsııasy Kúreńbel aýyldyq okrýginde karantın jarııalady. Qaratas aýylynyń kireberisine shlagbaým jáne dezınfektsııalyq kedergi ornatyldy.
Karantındik rejım aıasynda aýrýdyń oshaqtaryn joıý jáne onyń odan ári taralýyn boldyrmaý boıynsha is-sharalar jospary ázirlendi. Barlyq múddeli qyzmetter men bólimderdiń ózara áreket etý algorıtmi uıymdastyryldy.
Sońǵy málimetter boıynsha, indetten 410 qus ólgen. Qustardyń ólekseleri arnaıy beton shuńqyrda órteldi. Atalǵan oryndy dezınfektsııalaý qoldanystaǵy talaptarǵa sáıkes júrgizildi. Oshaqtyń aınalasyndaǵy 2400 sharshy metr aýmaqtaǵy aýlalar eki ret dezınfektsııalaýdan ótti. Jabaıy qustardyń ushý baǵyty boıynsha ornalasqan jeke sharýashylyqtarda úı qustaryn vaktsınatsııalaý júzege asyrylýda.
Qustardyń ıesine ótemaqy tóleý úshin komıssııa qurylǵan. Ótemaqy respýblıkalyq bıýdjetten tólenedi.
Oblys boıynsha Respýblıkalyq qordan 160 myń doza vaktsına bólinip, Jýaly aýdanyna 64,6 doza vaktsına berildi. Sonymen qatar, sý qoımasy jáne qus fabrıkalary ornalasqan Moıynqum, Baızaq, Jambyl, jáne Qordaı aýdandaryna qus tumaýyna qarsy egiletin vaktsınalary taratylyp berildi. Qazirgi ýaqytta qustarǵa vaktsınalaý jumystary júrgizilýde.
Oblysta jeke qosalqy sharýashylyqtarda barlyǵy 1 030 560 qus bar. Qus tumaýyna qarsy vaktsınatsııa úshin respýblıkalyq rezervten qosymsha 970 560 doza suraldy. Monıtorıng qorytyndylary boıynsha qustardyń ólimine qatysty basqa faktiler tirkelgen joq.
Búgingi tańda Jambyl oblysynda qus tumaýynyń epızootııalyq jaǵdaıy turaqty. Jaǵdaı oblys ákimdigi basshylyǵynyń kúndelikti baqylaýynda.