Jambyl oblysynda qulaǵan AN-2 ushaǵynyń apat sebepteri naýryzda belgili bolady
ASTANA. QazAqparat - Jambyl oblysynda qulaǵan AN-2 ushaǵynyń apat sebepteri eki-úsh aıdan soń belgili bolady. Bul týraly Azamattyq avıatsııa komıteti basshysynyń orynbasary Serik Muhtybaev málim etti.
"Qazirgi ýaqytta tergeý jumystary júrgizilýde. Oǵan arnaıy úkimettik jáne vedomstvolyq komıssııa quryldy. Ushaq apat ornynan Almaty qalasyna jetkizildi. Sol jerde onyń neden qulaǵanyn anyqtaıtyn bolady. Ol komıssııanyń taǵy úsh komıssııalyq toby jumys isteýde. Tergeý tobyna zaýyt ókilderi, táýelsiz sarapshylar da shaqyryldy. Sonyń ishinde quqyqqorǵaý organdary jumys jasaýda, biraq olar óz salasy boıynsha. Nátıjesi boıynsha qosymsha aqparattar usynylyp otyrady. Ushaq aýa raıynyń qolaısyz kezinde ushqan bolatyn. Apatqa sebep bolǵan barlyq faktorlar qaralýda", - dedi ol tilshilerge bergen suhbatynda.
Onyń sózine qaraǵanda, ushaq apatynyń sebepteri shamamen naýryz aıynda anyqtalady.
"Aldyn ala sebepterin aıta almaımyn, óıtkeni faktorlar óte kóp. Olar ádette aýa raıynyń qolaısyzdyǵy, tehnıkalyq jáne adamı faktorlardyń kesirinen bolyp jatady. Men oqıǵa ornynda boldym. Ushaq qatty zaqymdanǵan. Onyń barlyq bólikterin jınap, tergeý júrgizý qajet jáne onyń nátıjeleri qashan bolatynyn dóp basyp aıta almaımyz. Halyqaralyq tájirıbe boıynsha mundaı ushaqtar eki-úsh aı zertteledi", - dedi S. Muhtybaev.
Sonymen qatar komıtet tóraǵasynyń orynbasary, ushaqta áýe kerosıniniń ornyna avtokólik janar-jaǵarmaıy qoldanyldy degen BAQ-ta jarııalanǵan aqparatqa qatysty pikirimen bólisti.
"Áýe janarmaıynyń ornyna avtojanarmaıdy qoldanýǵa múmkindik beretin 2004 jylǵy buıryq bar. Bul buıryq úsh jyldyq qoldaný tájirıbesi jasalǵannan keıin qabyldandy. Bul másele atalmysh ushaqtyń jasaqtaýshylaryna baılanysty boldy. Qazirgi ýaqytta elde dál osyndaı 115 ushaq bar. Sońǵy bes jylda 27 áýe jaǵdaılary oryn aldy, olardyń 11-i áýe apattary", - dedi ol.
Onyń aıtýynsha, byltyr Azamattyq avıatsııa komıteti AN-2 áýe kemeleri úshin biryńǵaı tehnıkalyq qyzmet kórsetý baǵdarlamasyn qabyldady. "Sáıkestendirý tekseristeri kezinde 108 dana AN-2 ushaǵyn ushyrýǵa jiberilmegen. Olar tehnıkalyq qyzmetten ótkennen keıin ǵana áýe ushýlaryna jiberildi. Eger apat jaǵdaılary tehnıkalyq aqaýdan boldy dep anyqtalyp jatsa, keıin eldegi barlyq AN-2 áýe ushaqtary tekseristen ótkizilmek", - dep atap ótti S. Muhtybaev.
Onyń aıtýynsha, ushaqtyń apatqa ushyraýy sebepterin anyqtaıtyn sarapshylar shetelden tartylmaıdy. "Bizdiń otandyq mamandardyń biliktiligi óte joǵary jáne shetelden sarapshy shaqyrtý qajettiligi joq. AN-2 óte senimli ushaq. Ol 60 jyl boıy paıdalanylyp, óziniń myqtylyǵyn, sonshalyqty bir syna bermeıtindigin dáleldedi. Ushaq 1972 jyly shyǵarylǵan, biraq ushaqtarda eski degen uǵym joq, olarda ushýǵa daıyn nemese daıyn emes degen túsinik qana bar. Sondyqtan onyń shyǵarylǵan jylyna nazar aýdara berýdiń qısyny joq", - dep túıdi sózin ol.
