Jambyl oblysynda kóshpeli ekologııalyq zerthana jumys isteıdi
TARAZ. QazAqparat - Jambyl oblysynda 2020 jylǵa deıin óńirdiń ekologııalyq problemalarynyń kartasy nemese ónerkásip kásiporyndarynyń qaldyqtaryn qaıta óńdeý jumystary jolǵa qoıylady.
Jambyl oblystyq tabıǵı resýrstar jáne tabıǵat paıdalanýdy retteý basqarmasy jetekshisiniń orynbasary Jaqsylyq Saparalıevtiń sózinshe, búgingi tańda óńirde ekologııalyq jaǵdaı turaqty.
«Búgingi tańda basty nazarda turmystyq qatty qaldyqtar tur. 377 eldi mekende túrli ónerkásiptik jáne turmystyq qaldyqtardy joıýǵa arnalǵan 165 polıgon jumys isteıdi. Іri ónerkásip kásiporyndarynyń óndiristik qaldyqtary qaıta óńdeýge jiberiledi nemese tıisti standarttarǵa sáıkes ýtılızatsııalanady. Oblys ákiminiń tapsyrmasyna sáıkes, tıisti jol kartasy ázirlengen»,-dedi jetekshiniń orynbasary.
Aıta ketetin másele, sońǵy 15 jylda óńirdiń óndiristik múmkindikteri 2,5-3 esege artty. Ondaǵan jańa óndiris oshaqtary iske qosylýda, bul óz kezeginde qorshaǵan ortanyń emıssııasyna yqpal etpeı qoımaıdy. Osy jyldary atmosferaǵa ónerkásiptik qaldyqtardyń ósimi eki esege derlik artyp, 40 myń tonnany qurady.
Jaqsylyq Saparalıevtiń sózinshe, oblys boıynsha barlyǵy 2,8 mln tonna qatty qaldyqtar bar. Oblys ortalyǵynda qaldyqtardy bólek jınaý maqsatynda plastık jáne polıetılen zattarǵa arnalǵan 347 konteıner ornatylǵan. Bul qaldyqtar keıin nyǵyzdalyp, qaıta óńdeýge jiberiledi. Búgingi tańda qaldyqtardyń 79% qaıta óńdeledi.
Oblys ortalyǵy men aýdandarda ornalasqan ónerkásiptik qaldyqtardy baqylaý maqsatynda bıylǵy jyldan bastap, jyljymaly ekologııalyq zerthana iske qosylady.
«Atalmysh zerthana zaýyttardyń qyzmetiniń saldarynan atmosferaǵa tastalǵan qorshaǵan ortany lastaýy yqtımal zattardy jınastyryp, taldaý jasaıdy»,-dedi Jaqsylyq Saparalıev.
Sonymen qatar, ekologııalyq jaǵdaıdy ońaltý maqsatynda óńirde «Jasyl beldeý» baǵdarlamasy sátti júzege asyrylýda.
«2016 jyly Jambyl oblysynda ósimdikter 395 ga aýmaqqa otyrǵyzyldy. 2017 jyly bul kólem 1 gektardan asty. Bul baǵyttaǵy jumystar jalǵasa beredi»,-dedi spıker.
