Jambyl oblysynda koronavırýstyń bir de bir jaǵdaıy tirkelmegen aýyl bar

TARAZ. QazAqparat – Pandemııa bastalǵaly Jambyl aýdanyna qarasty Ernazar aýyldyq okrýginde koronavırýstyń bir de bir deregi tirkelmegen, dep habarlaıdy QazAqparat tilshisi.

Bul — indettiń aldyn alý maqsatynda aýyldaǵy júıeli túrde júrgizilgen túsindirý jumystarynyń nátıjesi deıdi turǵyndar.

Ernazar aýyldyq okrýgindegi 796 aýlada 1697 adam turady. Áleýmettiń áleýetin arttyrý úshin aıtarlyqtaı jumystar atqarylǵan.

Oqýshylar úshin bilim ordasy, búldirshinderge bóbekjaı, dárigerlik ambýlatorııa, mádenıet úıi men kitaphana jumys isteıdi. Eldi mekende 75 sharýa qojalyǵy tirkelgen bolsa, olarǵa 2471 gektar jer telimi berilgen. Okrýg boıynsha turǵyndardyń menshiginde 1426 múıizdi iri qara, 16768 qoı-eshki, 818 jylqy, 92 túıe, 2100 qus tirkelgen.

«Aýylda koronovırýs dertiniń bir de bir jaǵdaıy tirkelgen joq. Bul úshin kúsh salyp, reıd sharalaryn ózim bastap uıymdastyryp júrmin. Aýyldaǵy meshitte kúnine bes márte halyqqa indetten saqtaný joldary qulaǵdar etilse, áleýmettik nysandarǵa jadnamalardy jappaı ildik. Kórneki jerlerdegi bannerge karantın talaptary jazylǵan únparaqtardy japsyrdyq. Ýchaskelik polıtsııa qyzmetkerleriniń kóligindegi dybys ulǵaıtqyshtyń kómegimen betperde taǵý, araqashyqtyqty saqtaý kerektigin kóshe boıymen habarladyq.

Qandaı da bir syrqat belgileri anyqtalǵan naýqastyń birden dene qyzýyn ólshep, dárigerlermen birge úılerine jedel jettik.

Bálkim saqtyq sharalaryna aýyl bolyp kóńil bólgennen bolar, bul indetten amanbyz», — deıdi okrýg ákimi Myrzahan Ábdiqulov.

Onyń sózin kóshede sharýalarmen júrgen kópshiliktiń jappaı betperde taǵýy dáleldeı túskendeı.