Jambyl oblysynda koronavırýstan jazylyp shyqqandar 6 adamǵa jetti
TARAZ. QazAqparat – Búgin Jambyl oblysynyń úsh turǵyny koronavırýs ınfektsııasynan jazylyp, úılerine shyǵaryldy, dep habarlaıdy QazAqparat QR Prezıdenti janyndaǵy Tótenshe jaǵdaı rejımin qamtamasyz etý jónindegi Memlekettik komıssııanyń Jedel shtabyna silteme jasap.
Jedel shtab taratqan málimetterge qaraǵanda, emdelip shyqqandardyń ekeýi — anasy men uly, 1950 jáne 1979 jylǵy Taraz qalasynyń turǵyndary. Ekeýi de 2 sáýirde aýrýhanaǵa jatqyzyldy.
Úshinshisi - 1991 jylǵy Jambyl aýdanynyń turǵyny.
Aýyr júk tasymaldaýshy bolyp jumys isteıtin ol Reseıge júk tasyp, Almaty arqyly qaıtyp oralǵan. Ol da 2 sáýir kúni aýrýhanaǵa jatqyzyldy.
Olar eki apta boıy ınfektsııalyq statsıonarda bolyp, em sharalaryn qabyldady. Algorıtmge sáıkes, olardan koronavırýs ınfektsııasyna eki ret zerthanalyq taldaýlar alynyp, qorytyndysynda aýrýdan aıyqqany rastaldy.
Aldaǵy eki apta boıy olar jergilikti emhananyń ýchaskelik dárigeriniń baqylaýymen úı karantıninde bolady.
Búgingi tańda ınfektsııalyq statsıonarda 44 naýqas em alyp jatyr. Naýqastardyń jaǵdaıy qalypty, olar qajetti em sharalaryn alyp jatyr.
Jalpy bul óńirde koronavırýstan 6 adam saýyǵyp shyqty.
