Jambyl oblysynda koronavırýspen kúreske bólingen qarjy jymqyrylǵan

NUR-SULTAN. QazAqparat – Jambyl oblysy Densaýlyq saqtaý basqarmasynyń qyzmetkerleri indetpen kúreske bólingen qarjyny jymqyrý faktisimen kúdikke ilindi. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov málim etti, dep habarlaıdy QazAqparat.

«Jambyl oblysy boıynsha Sybaılas jemqorlyqqa qarsy qyzmet Jambyl oblysy ákimdiginiń Densaýlyq saqtaý basqarmasynyń laýazymdy tulǵalaryna qatysty pandemııamen kúreske bólingen bıýdjet qarajatyn medıtsınalyq buıymdardy joǵary baǵamen satyp alý arqyly jymqyrý faktisi boıynsha qylmystyq isti tergeýde. Osylaısha, memleketke 8 730 560 teńge somaǵa zalal keltirildi», - dedi D. Bıǵaıdarov Facebook paraqshasynda ótken onlaın brıfıngide.

Qazirgi kezde tergeý amaldary jalǵasýda.

Budan buryn habarlanǵandaı, bıylǵy 9 aıda laýazymdy tulǵalarǵa para berý faktileri boıynsha 381 sotqa deıingi tergeý tirkeldi.