Jambyl oblysynda koronavırýsqa qarsy kúresti qoldaý qory quryldy
TARAZ. QazAqparat – Jambyl oblysynyń ákimi Berdibek Saparbaev aımaqtyń iri kásiporyndarynyń basshylarymen kezdesti, dep habarlaıdy QazAqparat ákimdiktiń baspasóz qyzmetine silteme jasap.
«Memleket basshysynyń tapsyrmasyna sáıkes elimizde koronavırýstyq ınfektsııanyń taralýyna qarsy áreket etý boıynsha naqty sharalar qabyldandy. Oblysta jaǵdaı turaqty, aýrý faktileri tirkelgen joq. Mobıldi toptar qoǵamdyq oryndarda sanıtarlyq normalardyń saqtalýyn baqylap, azyq-túlik taýarlarynyń baǵasynyń negizsiz ósýine jol bermeý boıynsha sharalar qabyldanýda. Bizdiń basty mindetimiz – óńirdegi turaqtylyqty qamtamasyz etý», - dedi oblys ákimi kompanııa basshylarymen kezdesýinde.
Berdibek Saparbaev kásiporyn basshylaryna jumys oryndaryn bosatpaýǵa jáne jalaqy deńgeıiniń qysqarýyna jol bermeýge, eńbek zańnamasynyń qatań saqtalýyn, sondaı-aq óz mindettemelerin oryndaı otyryp, qyzmetkerler aldyndaǵy áleýmettik jaýapkershilikterin sezinýge shaqyrdy.
Aımaq basshysy Elbasynyń tapsyrmasy boıynsha oblysta koronavırýsqa qarsy kúresti qoldaý qory qurylǵanyn, onda kómek kórsetýge nıet bildirgen adamdardyń qarajaty jınaqtalatynyn atap ótti.
«Ótken jyly el turǵyndary birigip, qysqa merzim ishinde Arys qalasy tolyǵymen qalpyna keltirildi. Osyndaı qıyn ýaqytta biz beıǵamdyq tanytpaı, ásirese Astana men Almaty qalalarynyń turǵyndaryna qoldaý kórsetýimiz kerek», - dep atap ótti oblys ákimi.
Sondaı-aq, Berdibek Saparbaev az qamtamasyz etilgen, kóp balaly, múgedek jáne basqa da kómekke muqtaj otbasylarǵa aıryqsha kóńil bólýge shaqyrdy.
Basqosýǵa qatysqan kásiporyn basshylary Elbasynyń úndeýin qoldaýǵa daıyn ekendikterin bildirdi. Aıtalyq, 6,2 myń adam jumys jasaıtyn «Qazfosfat» JShS-de jumys oryndaryn bosatý kózdelmegen.
«Barlyq qyzmetkerler óz ornynda. Jańa jyldan bastap jalaqy 10 paıyzǵa kóterildi. Búginde ortasha jalaqy – 165 myń teńgeni quraıdy. Óz óndirisimizdiń ónimderin paıdalana otyryp, sanıtarlyq-epıdemıologııalyq normalardyń saqtalýyn qamtamasyz etýdemiz. Qyzmettik bólmelerge, jataqhanalarǵa jáne avtokólikterge dezınfektsııa júrgizilýde. Ujym ishinde túsindirý jumystary júrgizildi. Muqtaj otbasylarǵa kómektesýge barynsha tyrysýdamyz», - dep atap ótti kompanııa dırektory Muqash Eskendirov.
Aıta keteıik, búginde óńirde 22 iri jáne 48 orta kásiporyn jumys isteıdi. Onda 113 myń adam eńbek etýde. Kásiporyndardyń 91 paıyzymen áleýmettik turaqtylyqty qamtamasyz etý jáne qyzmetkerlerdiń bosaýyna jol bermeý boıynsha memorandýmdar jasaldy. Qazirgi ýaqytta jumys oryndaryn qysqartý oryn alyp otyrǵan joq.
