Jambyl oblysynda koronavırýs juqtyrǵandardyń biri – júkti áıel
TARAZ. QazAqparat – Jambyl oblysynda koronavırýs ınfektsııasyna shaldyǵýdyń jańa derekterine qatysty málimet berildi, dep habarlaıdy QazAqparat oblys ákimdiginiń resmı saıtyna silteme jasap.
1 oqıǵa 17 sáýir kúni (saǵat 22.50-degi jaǵdaı boıynsha), 4 jaǵdaı 18 sáýir kúni (saǵat 09.30-daǵy jaǵdaı) anyqtalǵan bolatyn. Onyń 2-eýi Qordaı aýdanynda, 2-eýi Taraz qalasynda jáne 1-eýi Jambyl aýdanynda tirkeldi.
17 sáýirde koronavırýs Qordaı aýdanynda anyqtaldy. Naýqas – Qyrǵyz Respýblıkasynyń azamaty, júrgizýshi. Almaty qalasyna júk artýǵa kele jatqan. Memlekettik shekarany kesip ótý kezinde «Qarasý» ótý pýnktinde odan PTR-ǵa alynǵan taldaý oń nátıje kórsetti. Naýqas arnaıy kólikpen Bishkek qalasyna jiberildi.
18 sáýirde tirkelgen eki naýqas – Qordaı jáne Jambyl aýdandarynyń turǵyndary.
Onyń biri – naýqaspen jaqyn baılanysta bolǵan tulǵa retinde Taraz qalasynda karantındik statsıonarda jatqan 2002 jyly týǵan qyz bala. Karantındik statsıonarǵa jatqyzǵan kúngi zerthana taldaýy teris nátıje kórsetkenimen, qaıtalap alynǵan taldaý qorytyndysy oń nátıje kórsetti.
Ekinshisi 1991 jyly týǵan Jambyl aýdanynyń turǵyny. Ol baılanysta bolǵan tulǵa retinde úı karantınine oqshaýlanyp, PTR-ge alynǵan taldaý oń nátıje kórsetken.
Qalǵan eki naýqas – Taraz qalasynyń turǵyndary.
1970 jyly týǵan áıel dene qyzýynyń joǵarylaýyna baılanysty densaýlyq jaǵdaıy boıynsha demalysta bolǵan. Alynǵan taldaý qorytyndysy koronavırýs ınfektsııasynyń bar ekenin kórsetti.
Sondaı-aq, Taraz qalasynan tirkelgen ekinshi naýqas –1987 jyly týǵan áıel. Júktiliginiń 20-aptasyn ótkizip jatqan ol joǵary dene qyzýy, entigý men jótelge qatysty shaǵymdarymen emhanaǵa jetkizilip, KVI-ǵa tekseris qorytyndysy oń nátıje kórsetken.
Infektsııa juqtyrǵan barlyq tórt qazaqstandyq oblystyq kópsalaly balalar aýrýhanasynyń juqpaly aýrýlar korpýsyna jatqyzyldy.
Úı jáne jumys oryndary boıynsha oshaqtarda epıdemııaǵa qarsy óńdeý is-sharalary júrgizildi. Epıdemıologııalyq tekseris barysynda baılanysta bolǵan 35 adam anyqtaldy.
Jalpy oblys aýmaǵynda koronavırýstyq ınfektsııanyń 58 jaǵdaıy tirkelgen. Onyń ishinde Taraz qalasynda - 9, Baızaq aýdanynda – 3, Jambyl aýdanynda – 4, Qordaı aýdanynda - 32, Merki aýdanynda - 2, Moıynqum aýdanynda – 1, Shý aýdanynda – 1, sondaı-aq Delı-Taraz reısinen 6 jaǵdaı anyqtalǵan.
Sońǵy derekter boıynsha Jambyl oblysynda ınfektsııany juqtyrǵandardyń jalpy sany – 58 adam.
