Jambyl oblysynda kópten kútken kópir paıdalanýǵa berildi

TARAZ. QazAqparat – El Táýelsizdiginiń 30 jyldyǵyna oraı Jambyl oblysynda Qoıgeldi-Ernazar baǵytyndaǵy avtojol boıynda jańadan salynǵan kópir paıdalanýǵa berildi, dep habarlaıdy QazAqparat.

Talas jáne Jambyl aýdandary arasyndaǵy jol qatynasyn retteýdegi mańyzy zor kópir qurylysy – turǵyndardyń kópten bergi tilegi bolatyn.

Nysannyń ashylýyna aımaq basshysy Berdibek Saparbaev qatysty.

«Bıliktiń eń negizgi mindeti – halyqqa jaǵdaı jasaý, halyqqa qyzmet etetin salalalardyń jumysyn jetildirý. Buǵan deıin qos aýdan turǵyndary osy kópirdi salý máselesin kótergen bolatyn. Búgin, mine, sizderdiń ótinishterińiz oryndaldy deýge bolady.

Memlekettiń qoldaýymen kópir men joldy salýǵa qarjy qarastyrylǵan. Qazirgi tańda kópirdiń jumystary tolyǵymen aıaqtalsa, joldy keler jyly paılanýǵa beretin bolamyz.

Qazaqta «Kópir salý – saýapty is» deıdi. Bul el Táýelsizdiginiń 30 jyldyǵy qarsańynda aýyldyqtar úshin tamasha tartý boldy dep oılaımyn. Osyǵan beı-jaı qaramaı, atsalysqan barsha azamattarǵa, jumysshylarǵa úlken alǵysymdy aıtamyn.

Munyń bári álbette Táýelsizdigimizdiń, beıbit tirshiligimizdiń arqasynda júzege asyp otyr. Sondyqtan azattyǵymyzdyń qadirin jete túsinip, ony baıandy etý jolynda árbirimiz aıanyp qalmaýymyz kerek», - dedi oblys ákimi.

Aıta keteıik, kópirdiń qurylysy aǵymdaǵy jyldyń qyrkúıek aıynda bastalyp, merziminen buryn aıaqtalyp otyr.

Al kúrdeli jóndeýden ótip jatqan Qoıgeldi-Ernazar avtojolynyń bes shaqyrymdyq bóligi keler jyly tolyǵymen paıdalanýǵa tapsyrylmaq.

«Qasterli merekemizge oraı kópten kútken kúrmeýli máselemiz óz sheshimin taýyp otyr. Eki aýdan, aýyl men qala arasyn jaqyndatqan bul kópirdiń paıdalanýǵa berilgeni biz úshin úlken qýanyshty jańalyq. Osynaý ıgi is úsh úshin memleket, oblys basshylyǵyna, qurylysshylarǵa rızashylyǵymyzdy jetkizgimiz keledi», - deıdi Ernazar aýylynyń turǵyny Nurbol Tórequlov.