Jambyl oblysynda kópbalaly otbasyǵa aýyldastary asarlatyp úı salyp berdi
TARAZ. QazAqparat – Jambyl aýdany Aısha-bıbi aýylyndaǵy kópbalaly otbasynyń otaǵasy Baqtııar Jampozovqa baspana kilti tabys etildi. Bes bólmeli úı jergilikti bıliktiń qoldaýymen «Asarlatyp úı salý» jobasy aıasynda turǵyzylǵan, - dep habarlaıdy QazAqparat tilshisi.
Saltanatty sharaǵa arnaıy qatysqan Jambyl oblysynyń ákimi Berdibek Saparbaev úı ıelerin quttyqtap, baq-bereke, tynyshtyq tiledi.
«Asar» – halqymyzdyń ejelden kele jatqan ıgi dástúri, ol adamdardy izgi iske jumyldyryp, jas urpaqty meıirimdilik pen janashyrlyqqa baýlıdy. Qazaqtar eshqashan jetimderi men jesirlerin jylatpaǵan. Jerlesterimizdiń muqtaj jandarǵa kómektesý týraly osyndaı usynysty bir aýyzdan qoldaǵany qýantady. Mundaı mereke ár otbasynda bola bersin!» - dedi oblys ákimi.
Búginde Baqtııar jubaıy Janar Muhamedııarovamen birge alty bala tárbıelep otyr.
«Úlken nemerem 11 jasta, kishisi bir jasqa toldy. Biz óte baqyttymyz jáne armanymyzdyń oryndalýyna kómektesken janashyr adamdarǵa shyn júrekten alǵys aıtamyz. Ulym qoǵamdyq jumystarǵa tartylǵan, al kelinim dekrettik demalysta. Olar uzaq jyldar boıy turǵyn úıdi jalǵa alyp, tapqan aqshalarynyń barlyǵyn derlik sonda jumsap júrdi. Endi olar óz úılerinde barynsha erkin ómir súredi dep oılaımyn. Qazirgi qýanyshty áserimizdi sózben aıtyp jetkize almaımyn», - deıdi úıdiń ájesi Ilan Aıtqulova kózine jas alyp.
