Jambyl oblysynda kompanııa jumysshylary jalaqylaryn kóterýdi talap etti
Aıtýlarynsha, bir jyldan beri eńbekaqylary keshiktirilip, zeınetaqy tólemderi toqtap qalǵan. Olar 170 myń teńge aılyq azdyq etkendikten, 30 paıyzǵa kóterýdi de suraıdy. «Shymkent spets kompleks» seriktestiginde isteıtin 30-dan astam jumysshy osyndaı talaptarymyzdy aıtamyz dep qýdalaýǵa ushyraǵandaryn aıtady.
Jýaly men Merki aýdandarynyń aralyǵyndaǵy respýblıkalyq aqyly joldy kútip ustaýǵa mindetti ashynǵan jumysshylar jol jóndeıtin qural-saımandarynyń da joq ekenin málimdedi.
«Bizde jumysshylary bar, júrgizýshileri bar, mehanızatorlary bar, bári qolmen jumys isteıdi. Jańa tehnıkalar joq. Óz ómirimizdi qaterge tigip, eski ári qaýipti tehnıkalardy paıdalanýǵa májbúrmiz», - dep túsindirdi jumysshy Maqsat Ájibaev.
Jolǵa jaýapty «Qazavtojol» ulttyq kompanııasy aktsıonerlik qoǵamynyń oblystyq fılıaly suhbat berýden bas tartty.
Al «Shymkent spets kompleks» seriktestiginiń basshylyǵy jalaqynyń keshiktirilýin joqqa shyǵarǵysy keldi.
«Áleýmettik tólemder de toqtaǵan jo»q deıdi ol.
Alaıda, jumysshylar jalaqylarynyń keshiktirilgeni týraly dálelderin alǵa tartqanda, amalsyz moıyndady.
«Jumysshylardyń, ıaǵnı sheberlerdiń qateligine baılanysty jalaqy keshiktirilip berilgeni ras. Basqa jumysshylar qatelik jasaǵandarǵa erip jumys oryndarynda joq bolǵandyqtan, zań júzinde akt toltyrylyp, jumystan shyǵaryldy. Eger ol kisiler qaıtadan kelip jumys isteımiz dese, biz qarsy emespiz», -dedi «Shymkent spets kompleks» JShS dırektorynyń orynbasary Maqsat Qurmantaı.
Aıta keteıik, buǵan deıin Jambyl oblysynda 2,7 myń úı jaryqsyz otyrǵanyn jazǵan bolatynbyz.
