Jambyl oblysynda kóktemgi dala jumystary bastalyp ketti
ASTANA. Jambyl oblysynda kóktemgi dala jumystary bastalyp ketti, dep habarlaıdy 24.kz telearnasy.
Óńirde qazirdiń ózinde 145 myń gektarǵa jýyq jer jyrtylyp, 110 myńnan astam aýmaqqa jazdyq masaqty daqyldar egilgen. Ótken jylmen salystyrǵanda, bıyl egis kólemi aıtarlyqtaı ózgermegen. Tek maıly daqyldar men qant qyzylshasyna basymdyq beriledi.
«jergilikti dıqandar bıyl sýdan tarshylyq kórmeıdi», - deıdi oblystyq aýyl sharýashylyǵy basqarmasynyń basshysy Nurjan Nurjigitov.
Óńirdegi egis alqaptaryn sýarýǵa qajetti tirshilik náriniń 80%-y qyrǵyz elinen keledi. Osyǵan baılanysty aldaǵy kúnderi kórshi el úkimetiniń úsh oblysyndaǵy ýákiletti ókilderimen kezdesý uıymdastyrylyp, memorandýmǵa qol qoıylmaq.
Onyń ústine bıyl oblysta tamshylatyp jáne jańbyrlatý ádisimen sýarylatyn egistik kólemi artqan. Aıta ketý kerek, bıyl óńirdegi aýyl sharýashylyǵy salasyn qoldaýǵa 6,5 mlrd teńge bólinip otyr.
«Byltyr bizde 8 100 gektar tamshylatyp sýarý alqaby boldy. Bıylǵy jyly taǵy 3 125 gektarǵa qosymsha jańbyrlatyp jáne tamshylatyp sýarý júıesin engizeıin dep otyrmyz. Sonymen, osy júıe oblys boıynsha 11 myń gektardan astam jerge engiziledi. Sý qoımalarynda sý jetkilikti», dep atap ótti aýyl sharýashylyǵy basqarmasynyń basshysy.
