Jambyl oblysynda kóktemgi dala jumystary bastaldy
TARAZ. QazAqparat – Aǵymdaǵy jyly aýa-raıynyń jyly bolýyna baılanysty kóktemgi dala jumystary erterek bastalýda. Bul oraıda daıyndyq barysyndaǵy máseleler oblys ákimi Berdibek Saparbaevtyń tóraǵalyǵymen ótken apparattyq keńeste jan-jaqty aıtyldy, - dep habarlaıdy QazAqparat tilshisi.
Aımaq basshysy boljamdy kórsetkish boıynsha bıyl da sýarmaly sý máselesi týyndaıtynyn eskertip, ol boıynsha aldyn-ala naqty sharalar qabyldaý úshin tıisti tapsyrmalar berilgendigin atap ótti.
«Men buǵan deıin qoımalardy barynsha sý qorymen tolyqtyrý, ol úshin kanal, aryqtardy tazalaý, jer asty sýlaryn tıimdi paıdalaný, uńǵymalar qazý sekildi naqty tapsyrmalar bergen bolatynmyn.
Ylǵaldy az qajet etetin daqyldarǵa kóńil bólińizder. Qolda bar sýdy únemdi, tıimdi paıdalaný úshin qazirden arnaıy keste ázirlep, bekitý kerek.
Qaı aýdan qansha jerge ne egedi? Sol boıynsha zerdeleý jumystaryn júrgizińizder»,-degen aımaq basshysy aýdandardaǵy jumystardy ózi baryp tekseretinin basa aıtty. Orynbasarlary men tıisti basqarma basshylaryna da árbir kanal men qoımalardyń, egistik alqaptardyń jaı-kúıin kózben kórýdi tapsyrdy.
Oblys ákimi sýdyń dalaǵa ketpeýin, qazirden jaıylym, shabyndyqtardy sýara berý kerektigin jetkizdi.
Oblystyq aýyl sharýashylyǵy basqarmasynyń basshysy Erbol Jıenqulov baıandama jasap, aǵymdaǵy jyly aýyl sharýashylyǵy daqyldaryn 741,2 myń gektarǵa ornalastyrý josparlanyp otyrǵandyǵyn aıtty.
«Sýdyń túsý kólemi jáne ishki sý kózderiniń tolý kórsetkishi qajetti deńgeıden tómen bolǵan jaǵdaıda 741,1 myń gektardyń ishinde sýdy kóp qajet etetin daqyldardy sýdy az qajet etetin daqyldarmen almastyrylatyn bolady. 179,2 myń sýarmaly alqapta ornalasatyn daqyldarǵa taldaý jasalynyp, qajetti sý kólemi esepteldi.
Sý jınalý deńgeıi ótken jylǵydaı bolǵan jaǵdaıda «QazSýShar» mekemesiniń teńgerimindegi sý qoımalary arqyly 1 mlrd. 358,0 mln.m3 sý berý josparlanýda. Al búgingi kúnge tómen deńgeıdegi sý túsýin eskersek 1 mlrd. 148 mln.m3 sýmen qamtý kózdelýde»,-dedi E. Jıenqulov.
Erbol Jıenqulov óńirde kóktemgi dala jumystary bastalǵandyǵyn, Baızaq, T.Rysqulov, Merki aýdandarynda jer jyrtylyp, arpa egý sharalary qolǵa alynǵandyǵyn atap ótti.
«Egistik alqapty kemitýge bolmaıdy, barynsha arttyrý kerek. Mol ónim alý úshin eń birinshi tuqymnyń sapasyna, ony taldap-tekserýge kóńil bólińizder. Tyńaıtqyshtardy tıimdi paıdalaný boıynsha jumystar nashar oryndalýda.
Qyzylsha alqabyn da azaıtpaýǵa tıispiz.
Halyqtyń negizgi kún kórisi – jer jáne mal sharýashylyǵy. Kartop, qyryqqabat, sábiz boıynsha mol ónim alyp, ózimizdi tolyǵymen qamtýǵa qol jetkizý qajet. Sý únemdeý tehnologııalaryn bıyl 50,0 myń gektarǵa jetkizý boıynsha da jumystardy utymdy uıymdastyrý mańyzdy»,-deı kele oblys ákimi jylyjaılar kólemin arttyrýǵa da qatysty tapsyrmalar júktedi.
