Jambyl oblysynda qoǵamdyq kólik tolyǵymen toqtaıdy
TARAZ. QazAqparat – Jambyl oblysynda karantın sharalary kúsheıtiledi. Bul týraly oblysy ákiminiń birinshi orynbasary Bekbolat Orynbekov men oblystyq taýarlar men kórsetiletin qyzmetterdiń sapasy jáne qaýipsizdigin baqylaý departamenti basshysynyń orynbasary Ǵazız Nadýevtiń qatysýymen ÓKQ-niń aqparat alańynda ótken brıfıngte aıtyldy, dep habarlaıdy QazAqparat.
Spıkerler17 sáýirden bastap Jambyl oblysy boıynsha karantındik sharalar qatań kúsheıtilgen rejımge ótetinin jetkizdi. Ol QR Bas memlekettik sanıtarlyq dárigerdiń 2020 jylǵy 14 sáýirdegi qaýlysyna sáıkes júzege asyrylady.
«Atalǵan indetpen tirkelgender sanynyń artýyna baılanysty qajetsiz júristi azaıtý úshin atalǵan shekteýdi biz kúsheıtetin bolamyz. Óńirdegi kásiporyndar jumysyna, azyq-túlik tasymaldaý men ótkerýge qatysty da baqylaý kúsheıtilmek. Osy rette eskere ketetin bir jaıt – kez kelgen jerde sanıtarlyq saqtyqty, ásirese kezekte turǵanda ara qashyqtyq saqtap, aldyn alý sharalaryna muqııat bolǵan abzal», – dedi Ǵazız Nadýev.
Al oblys ákiminiń birinshi orynbasary Bekbolat Orynbekov kúsheıtilgen talaptarǵa toqtalyp ótti.
«Óńirde karantın sharalary qatańdatylmaq. Eń aldymen, Taraz qalasy men oblys kóleminde qoǵamdyq kólikterdiń jumystary tolyq toqtatylady. Bul másele boıynsha óńirdegi 442 avtobýstyń 43 baǵytpen jumys jasaǵan kezinde olardyń sanyn 10 baǵytqa azaıttyq. Alaıda tasymaldaýmen aınalysqan qalǵan avtobýstar áýeli júrý tártibin saqtamady. Avtobýspen qatynaıtyn turǵyndardyń sany kúrt kóbeıýine baılanysty osyndaı qadamǵa barýymyzǵa týra keldi», - dedi B.Orynbekov.
Ol jeńil kólik pen turǵyndardyń qozǵalysyna qatysty da talaptyń kúsheıetinin aıtty.
«Qala men oblys deńgeıinde jeńil kóliktiń sany kóbeıdi, onyń ishinde eki júrgizýshiniń birinde anyqtamasy bar. Tipti aýyl ákiminiń anyqtamasy da kezdesedi. Osynyń bárin eskere kelip, óńirdegi 38 blok bekette 17 sáýir kúni tańǵy saǵat 8.00-den bastap ondaı anyqtamanyń kúshi joıylatyndyǵyn málim etemiz. Bul másele qalaı sheshimin tabady? Ol úshin biz 14 myńnan astam kólik pen adam sany engizilgen «Sergek» bazasy men planshetterge basqarma basshylarymen, qala-aýdan ákimderimen, basqa da memlekettik qyzmetshilermen kelise otyryp, tolyq tazalaý jumysyn júrgizemiz. Halyqtyń qala ishindegi qozǵalysy qazir eshqandaı syn kótermeıdi. Osyǵan baılanysty jergilikti polıtsııa qyzmeti men áskerıler birlese otyryp, kúndizgi ýaqytta naqty sharalar qabyldaıtyn bolady», - dedi oblys ákiminiń birinshi orynbasary.
Mundaı sheshimderdi Taraz qalasy men aýdan ákimderi óz aımaqtarynda da qabyldaýy qajet.
Qajy MURAT
