Jambyl oblysynda «Qoǵamdyq qabyldaý» toby quryldy
Top quramyna 28 adam engen, olardyń qatarynda eńbek ardagerleri, zııaly qaýym, BAQ, etnomádenı birlestikter ókilderi, depýtattar, kásipkerler, qoǵam belsendileri bar.
Oblys ákimdiginde ótken kezdesýde aımaq basshysy jumys tobynyń múshelerine sáttilik tilep, aýdandar men Taraz qalasynyń ákimdikteri, basqarmalar men departamentter olarǵa jan-jaqty qoldaý kórsetetinin aıtty.
«Qazir oblysymyzda qoǵamdyq-saıası ahýal turaqty. Qańtardaǵy oqıǵalardan keıin oblys aýdandaryna jumys toptary attandy, olar turǵyndar arasynda aqparattyq-túsindirý jumystaryn júrgizedi, turǵyndardyń ótinishteri men tilekterin tyńdaıdy, jergilikti jerlerdegi ózekti máselelerge nazar aýdarady. Biz bolǵan oqıǵanyń sebepterin anyqtap, bolashaqta mundaı jaǵdaıdyń qaıtalanbaýy úshin qoldan kelgenniń bárin jasaý mańyzdy», - dedi oblys ákimi.
Berdibek Saparbaev turǵyndardy alańdatyp otyrǵan máseleler týraly der kezinde habardar bolyp otyrý mańyzdy ekenin atap ótti.
«El Prezıdenti Qasym-Jomart Toqaev óz Joldaýynda basty maqsat – azamattardyń barlyq syndarly saýaldaryna jedel ári tıimdi jaýap berý ekenin basa aıtty. Bılik pen qoǵamnyń turaqty dıalogy arqyly ǵana úılesimdi memleket qurýǵa bolady. Memleket basshysy ózekti jalpymemlekettik mindetterdi talqylaýǵa azamattyq qoǵamdy barynsha tartýdy tapsyrdy.
Jergilikti bıliktiń halyqpen baılanysyn nyǵaıtý maqsatynda Qoǵamdyq qabyldaý bólmesi quryldy. Toptyń barlyq músheleri óz salasynyń kásibı mamandary. Birlesken kúsh-jigerimizben ózekti máselelerdi jedel sheshetin bolamyz. Bizdiń ortaq maqsatymyz – halyqtyń bılikke jáne jalpy memleketke degen senimin arttyrý», - dedi oblys ákimi.
Top músheleri túıindi túıtkilderdi anyqtaý úshin aýdandardy aralap, jergilikti turǵyndarmen kezdesedi. Oblys ákimi Memlekettik organdar jumys tobyna qajetti aqparatty ýaqytyly berip otyrý kerektigin eskertti.
«Búgin biz tárbıeniń ulttyq bastaýy men qaǵıdattarynan negiz alyp, jastardyń kúsh-jigerin jasampaz arnaǵa baǵyttaýymyz kerek. Bul barlyq kezdesýlerdiń ózegine aınalýy tıis. Jastar – bizdiń bolashaǵymyz», - dep túıindedi oblys ákimi.
Top músheleriniń ortaq sheshimimen Qoǵamdyq qabyldaýdyń meńgerýshisi bolyp «Jańarý» sybaılas jemqorlyqqa qarsy jalpyulttyq qozǵalysy» RQB fılıalynyń basshysy Qasymhan Tólendıev saılandy.
Jıyn barysynda Jambyl oblystyq máslıhatynyń hatshysy Mahmetǵalı Sarybekov, Qazaqstan Eńbek Eri Muqash Eskendirov, «ARSMI» qoǵamdyq birlestiginiń tóraıymy Janna Mamasheva da óz oılaryn ortaǵa saldy.
