Jambyl oblysynda kenemen kúreske 137 mln teńge bólindi
TARAZ. QazAqparat - Jambyl oblysynyń aýdandarynda kongo-qyrym qandy bezgeginiń tabıǵı oshaqtarynda ornalasqan eldi mekenderdi zalalsyzdandyrý sharalary aıaqtaldy, dep habarlaıdy «QazAqparat» HAA tilshisi.
KQQB tabıǵı oshaqtarynda ornalasqan eldi mekenderdi qorǵaý boıynsha josparly sharalarǵa 137 mıllıon teńge bólindi, - dedi Jambyl oblysy ákimdigi veterınarııa basqarmasynyń basshysy Ospan Berdııarov.
«Jambyl oblysynda 92,6 mln teńgege kenege qarsy qoldanylatyn dárilik preparattar satyp alynady. Al dárileý sharalaryn júrgizýge aýdandardyń bıýdjetinen 45,7 mln teńge bólinedi», - dep naqtylady ol.
Buǵan deıin Jambyl oblysy aýmaǵynda KQQB tabıǵı oshaqtary Moıynqum, Sarysý jáne Talas aýdandaryna 70 myńnan astam adam ómir súretin 49 eldi mekenge tarady. 2015 jyly asa qaýipti vırýstyń Jambyl aýdanynan da tabylý faktisin mamandar baqylanbaǵan maldyń kóshýimen túsindirdi. 2016 jyly Baızaq aýdanynyń otyz jastaǵy turǵyny keneniń shaǵýynan kóz jumdy.
Jambyl oblysynda alǵash ret 1982 jyly tirkelgen kongo-qyrym qandy bezgeginiń tabıǵı oshaq aýmaǵy 136 esege 200-den 27,1 myńsharshy shaqyrymǵa deıin ulǵaıǵan.
