Jambyl oblysynda Qazaqstannyń úzdik jas búrkitshileri anyqtaldy
«Búrkitshi-2018» jarysy Jambyl aýdanynyń Bektóbe aýylynda ótkizildi. Jarys baǵdarlamasynda - qustyń ıesiniń qolyna ushyp qoný buıryǵyn oryndaý, erkin ushyrý, janýarlar men qustardy aýlaý qarastyrylǵan.
Jambyl oblysyn ákimdiginiń Dene shynyqtyrý jáne sport basqarmasynan atap ótkendeı, chempıonat Memleket basshysy Nursultan Nazarbaevtyń «Uly dalanyń jeti qyry» atty maqalasynyń aıasynda uıymdastyrylǵan.
Chempıonat qorytyndylary boıynsha, búrkitpen birge ań aýlaý jarysynda Atyraý sportshysy Sarmat Ábdýlkárimuly jeńiske jetse, suńqarmen ańǵa shyǵýda Berikbolsyn Jalǵasuly, qarshyǵamen ań aýlaýda - Saǵı Mahmuthanǵa teń keler eshkim bolmady. Júldegerler arasynda sondaı-aq Jambyl, Túrkistan, Almaty jáne Aqmola oblystarynan kelgen búrkitshiler boldy.
Jambyl quramasynyń aǵa jattyqtyrýshysy Bazarbek Kúntýǵanuly osyndaı jarystar búrkitshilikti nasıhattaýǵa múmkindik beretindigin atap ótti.
«Búrkitpen ańǵa shyǵý dástúrin jańǵyrtý úshin Qazaqstandaǵy Ulttyq sport túrleri qaýymdastyǵynyń bastamasymen jyl saıyn búrkitshiler saıystary ótkizilip turady. Jambyldyq búrkitshiler elimiz boıynsha tanymal. Olardyń arasynda Baqdáýlet Babajanov, Qazaqstannnyń birneshe dúrkin chempıony Baýyrjan Eshmetov, Óserbaı Qadyrqulov, Baqyt Qarnabaevtyń esimderin atap ótýge bolady. El chempıonattarynyń Shernııaz ben Túrnııaz Baýyrjan sııaqty jas jeńimpazdary da bar», - dedi ol.
Búginde Jambyl oblysynyń jabaıy faýnasynda qanatty jyrtqysh qustar arasynda ıtelgi, búrkit, qarshyǵa, usaq suńqarlardy kezdestirýge bolady.
