Jambyl oblysynda qazaqstandyq qamtý máselesi talqylanatyn bolady
Onda Indýstrııa jáne jańa tehnologııalar mınıstrligi, Jergilikti qamtýdy damytý ulttyq agenttigimen jáne oblystyq ákimshilikpen birlesip, óńirdegi óndiristik ınvestjobalardyń iske asyrylýyn, «Ónimdilik - 2020» jáne «Jol kartasy» baǵdarlamalarynyń júzege asyrylýy barysyn talqylaıtyn bolady.
Budan bólek, sapar barysynda jergilikti qamtýǵa qatysty máselelerdi birlesip sheshý maqsatynda óńirdegi barlyq jer qoınaýyn paıdalanýshylarmen kezdesýler ótetini josparlanýda. Bul rette mınıstrlik jer qoınaýyn paıdalaný salasynda qyzmet etetin barlyq kompanııalardy nazardan tys qaldyrmaı, árqaısysymen jeke jumys júrgizýdi qolǵa alatyn bolady.
Sonymen qatar, mańyzdy máselelerdiń biri bir jaǵynan jergilikti óndirýshilerdi, ekinshi jaǵynan otandyq jáne sheteldik tapsyrys berýshilerdi qatystyrý arqyly júzege asatyn jobalarda qazaqstandyq qamtýdy damytýdy talqylaý kózdeledi.
Málimetke súıensek, Jambyl oblysynda satyp alýdyń jalpy kóleminde jergilikti qamtýdyń úlesi aıtarlyqtaı ósip keledi. Eger 2010 jyly bul kórsetkish tek 1,6 paıyzǵa teń bolsa, 2011 jyldyń qorytyndylary boıynsha kórsetkish 3,3 paıyzǵa jetken. Aımaqta eksportqa baǵyttalǵan jańa hımııalyq ónim kásiporyndaryn endirý nátıjesinde qazaqstandyq qamtý úlesi anaǵurlym artatyny boljanady. Al bundaı joǵary tehnologııalarǵa negizdelgen 15-ke tarta zaýyt salý josparlanýda. Budan basqa, bir jarym myń jumys ornyn ashýdy qarastyratyndyqtan, óńirde áleýmettik turǵydan mańyzdy máseleler de sheshimin tabatyn bolady.
