Jambyl oblysynda Qazaqstan-Reseı birlesken oqý-jattyǵýyna daıyndyq ótti

TARAZ. QazAqparat – Jambyl oblysynda Qazaqstan men Reseıdiń birlesken oqý-jattyǵýynyń birinshi aptasy daıyndyqqa arnalyp, qatysýshylar zańsyz qarýly qurylymdardy joıý boıynsha birlesken is-qımyldardy oryndaýdy bastap ketti, dep habarlaıdy QazAqparat tilshisi.

Aıta keteıik, aǵymdaǵy jyldyń 20 qyrkúıegi kúni «Ońtústik» óńirlik qolbasshylyǵynyń qazaqstandyq taýly-egerlik bólimshesi men Reseı Qarýly Kúshteriniń 55-shi taý motoatqyshtar brıgadasynyń rotalyq-taktıkalyq tobynyń birlesken arnaıy oqý-jattyǵýy ótedi. Búginde oǵan daıyndyq sharalary belsendi uıymdastyrylýda. Bul shara elimizdiń shyǵysyndaǵy «Shyǵys-2019» jedel-taktıkalyq komandalyq-shtabtyq oqý-jattyǵýy aıasynda qolǵa alynǵan.

Oqý-jattyǵýdyń daıyndyq kezeńi Qazaqstan-Reseı birlesken bólimshelerin jaýyngerlik ázirliktiń joǵary dárejesine keltirýge sıgnal berýmen bastaldy. Ol boıynsha bólimshege bir jerden ekinshi jerge qozǵalý qajet bolatyn. Osy maqsatta, áskerı tehnıka kolonnasy «Teris-Aşybulaq» polıgonynda shoǵyrlanyp, ashyq dalada túnep, «Aısha bıbi» polıgonyna attandy. Qoıylǵan mindetterdi sapaly jáne tolyqqandy oryndaý úshin ofıtserler men áskerı qyzmetshiler ózderiniń barlyq kásibı múmkindikteri men qabiletterin, sondaı-aq jaýyngerlik daıarlyqtyń joǵary deńgeıin kórsetýge tyrysty. Bul týraly «Ońtústik» óńirlik qolbasshylyǵy áskerleriniń qolbasshysy general – maıor Qaıdar Qaraqulov aıtyp berdi.

«Bul kezendegi sharanyń basty sharty: birge bastaý jáne birge márege jetý edi. Eshkim dıstantsııadan Ketken joq, fınıshke barlyǵy tolyq quramda keldi. Aýyr júkteme, dala jaǵdaıyndaǵy túngi joryq jaýyngerlerdiń fızıkalyq jaǵdaıyn ǵana emes, olardyń jaýyngerlik rýhyn da nyǵaıtty. Oqý-jattyǵýǵa qatysýshylar birlesken oqý-jattyǵýdyń jalpy nátıjelerin qorytyndylaıtyn kezeńde jaqsy nátıje kórsetedi dep senemin»,-deıdi Qaıdar Qaraqulov.