Jambyl oblysynda qaıyrymdyq sharalary jalǵasyp jatyr
Bul iske jergilikti kásipkerler de judyryqsha jumylyp, óz qarajatyna ókpeni jasandy jeldetý, ottegi kontsentratory sııaqty qurylǵylardy satyp alyp, aýrýhanalarǵa tartý etip otyr.
Jambyldyq iri kásipkerler qazirdiń ózinde jergilikti densaýlyq saqtaý qyzmetine qarjy jınap, arnaıy ókpege aýa berý, kontsentrator apparattaryn, qajetti dári-dármekter satyp alyp, oblystyń aýrýhanalaryna taratýda. Olardyń ishinde, Qazaqstannyń Eńbek Eri jáne Jambyl oblysy QHA múshesi, «Kazfosfat» JShS bas dırektory Muqash Eskendirov 38 mln teńgege oblystyq ınfektsııalyq aýrýhanaǵa 10 IVL apparatyn satyp alyp berdi.
Sonymen qatar, Jambyl oblysynyń Qazaqstan halqy Assambleıasy «Radonej» orys mádenı ortalyǵynyń múshesi Mıhaıl Platov oblysqa qarasty barlyq aýdan emhanalaryna ottegi toltyrylǵan ballondardy, dári-dármek ónimderin tasyp kómek kórsetýde. Búgingi tańda ıgi iske oblys aımaǵyndaǵy barlyq eriktiler jumyldyryldy. Al Jambyl oblysy QHA Shý aýdandyq kúrdiler etnomádenı birlestigi turmysy tómen otbasyǵa asarlatyp úı turǵyzýǵa 300 myń teńge kóleminde demeýshilik etti.
Oblystyq ózbek etnomádenı birlestiginiń tóraǵasy Mýmınov Bahrom Taraz qalasynyń kópsalaly klınıkalyq aýrýhanasynyń jansaqtaý jáne pýlmonologııa bóliminde adam janyna arasha bolyp jatqan dárigerlerdi 200 000 teńge kóleminde ystyq tamaqpen qamtamasyz etti.
El basyna kún týsa, etigimen sý keshetin azamattardyń biri «Golden Compass Jambyl» JShS dırektory Izalov Kýrban Zakırjanovıch T.Rysqulov jáne Merki aýdandarynyń aýrýhanalaryna bir-bir danadan quny 12 mıllıon teńge turatyn ókpeni jasandy jeldetý apparatyn syıǵa tartty.
Jambyl oblysy QHA «Jańǵyrý joly» jastar qozǵalysynyń belsendileri az qamtylǵan 7 otbasyǵa 100 000 teńgege 50 keli salmaqta et taratyp, karantın kezinde baspanasyz qalǵan jalǵyzbasty anany 500 000 teńge kóleminde turmysqa qajetti zattarmen qamtamasyz etti.
Qysqasy álemdik pandemııanyń saldaryn joıýda Jambyl oblysy QHA músheleri men belsendileri «bir jeńnen qol, bir jaǵadan bas» shyǵaryp áreket etýde. Belsendilerdi bir maqsatqa jumyldyrǵan bul jumystyń nátıjesi aımaqtaǵy koronavırýstyq ınfektsııanyń keń taralaýyna jol bermeý jáne onyń saldaryn joıý bolyp otyr.
