Jambyl oblysynda kásipkerlik bastamalardy damytýǵa 500-den astam grant berildi
Jambyl oblysynda bıyl josparlanǵan 1054 granttyń 525-i berildi, al alýshylar ózderiniń bıznes-jobalaryn sátti júzege asyrýda, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
400 AEK mólsherinde memlekettik grant alýshylardyń biri, Jambyl oblysynyń Masanshy aýylynyń turǵyny Gúlnur Kýnysheva berilgen qarajatqa qajetti qural-jabdyqtar satyp alyp, medıtsınalyq ortalyq ashty.
«2022 jyly Qordaı aýdanynyń jumyspen qamtý bólimine habarlasyp, barlyq qajetti aqparatty alyp, «Bastaý bıznes» jobasy boıynsha kásipkerlik negizderine oqytýdan ótip, sertıfıkat aldym. Biraq, ótinishti osy jyly berdim. Alynǵan aqshaǵa men ýltradybystyq apparat satyp alyp, medıtsınalyq ortalyq ashýdy sheshtim», – dedi áıel.
Gúlnur Kýnysheva medbıke isi mamandyǵyn támamdap, osy sala boıynsha jumys istegen. Qazirgi ýaqytta «Em bolsyn» medıtsınalyq ortalyǵyn quryp, qosymsha 6 jumys ornyn ashyp otyr. Ortalyqta zerthana, stomatolog kabınetteri, ÝDZ jumys isteıdi. Bolashaqta rentgen kabınetin ashýdy josparlaýda.
Sondaı-aq, Gúlnur Kúnbatys aýylynda turatyn úlken aǵasy da ótken jyly 1 mln 200 myń teńge kóleminde grant alǵanyn jáne bólingen aqshaǵa ol 6 bas iri qara satyp alyp, mal basyn kóbeıtýdi qolǵa alǵanyn aıtty.
«Grant – isin jańadan bastaǵan kásipkerler úshin óte jaqsy kómek. Memleketke osyndaı múmkindikter men qoldaý kórsetip otyrǵany úshin alǵysymdy bildiremin», – dedi kásipker.
Esterińizge sala keteıik, bıyl respýblıka boıynsha halyqtyń áleýmettik osal toptary úshin 9 myń grant berý josparlanyp otyr, al búgingi tańda 5,3 myńnan astamy berildi.
Business.enbek.kz portaly arqyly jańa bıznes-ıdeıalardy iske asyrý úshin memlekettik granttar alýǵa ótinishterdi qabyldaýdyń úshinshi legi 2023 jyldyń qyrkúıek aıyna josparlanýda. Tıisti habarlandyrý ótinishterdi qabyldaý bastalǵanǵa deıin kúntizbelik 10 kún buryn QR Eńbek jáne halyqty áleýmettik qorǵaý mınıstrliginiń jáne halyqty jumyspen qamtý máseleleri jónindegi organdardyń resmı ınternet-resýrstarynda jarııalanatyn bolady. Portalda ótinishterdi qabyldaý merzimi ár lekte 10 jumys kúnin quraıdy.
