Jambyl oblysynda karantın rejımi jeńildetildi
TARAZ. QazAqparat – Jambyl oblysynda karantın rejımi saqtalady. Degenmen, 11 mamyrdan bastap karantındik sharalardy jeńildetýdiń ekinshi kezeńi engizilýde. Tıisti sheshim oblystyq jedel shtab jáne óńirdiń bas memlekettik sanıtarlyq dárigeriniń qaýlysymen qabyldandy, dep habarlaıdy QazAqparat oblys ákimdigine silteme jasap.
Oblys ákimi baspasóz qyzmetiniń habarlaýynsha, óńirde aýdany 500 sharshy metrge deıingi azyq-túliktik emes dúkenderdiń (barlyq baǵyttar) jáne turmystyq tehnıka dúkenderiniń qyzmetine ruqsat etilýde. Olardyń jumys ýaqyty saǵat 09.00-den 18.00-ge deıin belgilengen.
Sondaı-aq, 11 mamyrdan bastap turmystyq jáne keńse tehnıkalaryn jóndeý boıynsha servıs ortalyqtary, aqparattyq-kommýnıkatsııalyq tehnologııalar kompanııalary, jarnama agenttikteri, rıelterlik jáne saqtandyrý kompanııalary jumys isteı bastaıdy.
«Jeke medıtsınalyq ortalyqtardyń (aldyn ala jazylym boıynsha), optıka dúkenderiniń, fotosalondardyń, gúl dúkenderi men dúńgirshekterdiń qyzmeti qaıta jandanady. Jumys ýaqyty saǵat 09.00-den 18.00-ge deıin.
Jumysty qaıta qalpyna keltirýde sanıtarlyq-epıdemıologııalyq talaptardy qatań saqtaý kerek. Sanıtarlyq tazartqysh, medıtsınalyq maska, qolǵaptyń jáne t.b. bolýy tıis.
Alaıda, iri saýda jáne oıyn-saýyq ortalyqtary, bazarlar, kınoteatr, monsha keshenderi, shashtaraz ben sulýlyq salondary, kompıýterlik klýbtar, fıtnes-ortalyqtar jáne adamdar kóp jınalatyn basqa da oryndardyń, sondaı-aq qoǵamdyq kóliktiń jumysyna áli de tyıym salynady», - delingen baspasóz qyzmetiniń habarlamasynda.
Budan bólek oblys pen Taraz qalasynyń shekaralary boıynsha avtojoldarda, koronavırýs aýrýy anyqtalǵan eldi mekenderde blokposttar jumysyn jalǵastyrady.
Sondaı-aq, jambyldyqtarǵa kóshede jeke sportpen aınalysýyna men jattyǵýyna, úıine jaqyn mańda serýendeýine ruqsat etildi.
Karantın sharalaryn jeńildetýdiń kelesi kezeńi boıynsha sheshimdi óńirdegi qalyptasqan sanıtarlyq-epıdemıologııalyq jaǵdaıdy eskere otyryp, jedel shtab qabyldaıdy.
