Jambyl oblysynda karantın rejımi jeńildetildi
TARAZ. QazAqparat – Jambyl oblysynda karantındik sharalardy jeńildetý týraly sheshim qabyldanyp, birqatar nysandarǵa jumystaryn qaıta bastaýǵa ruqsat etildi, dep habarlaıdy QazAqparat oblys ákimdiginiń resmı saıtyna silteme jasap.
QR Prezıdentiniń jáne tótenshe jaǵdaı rejımin qamtamasyz etý jónindegi memlekettik komıssııanyń tapsyrmasyna sáıkes Jambyl oblysy ákimdiginiń jedel shtaby 2020 jyldyń 28 sáýirinde ruqsat etilgen qyzmet túrleriniń tizbesin keńeıtý jáne karantın rejımin jeńildetý týraly sheshim qabyldady.
«Atap aıtqanda, endi óńirde azyq-túlik emes taýarlary: turmystyq hımııa jáne sharýashylyq taýarlaryn satý boıynsha usaq saýda nysandarynyń (aýdany 100 sharshy metrge deıin) qyzmetine ruqsat etiledi.
Sondaı-aq, avtokólik satatyn dúkenderdiń, avto qosalqy bólshekter satatyn dúkenderdiń (avtomobıldik qosalqy bólshekterdi satý jónindegi bazarlardy qospaǵanda), kólik jýý, TQS, lombardtar, valıýta aıyrbastaý pýnktteri, notarıaldyq jáne advokattyq keńseler, tigin jáne aıaq kıim sheberhanalary, hımııalyq tazalaý jáne kir jýý oryndary ashylady», delingen habarlamada. Bul nysandar saǵat 10.00-den 18.00-ge deıin jumys istemek.
Degenmen, jumysty qaıta bastaý úshin ol nysandar barlyq sanıtarlyq-epıdemıologııalyq talaptardy qatań saqtaýǵa mindetteledi. Naqtyraq aıtsaq, sanıtarlyq tazartqyshtardyń, medıtsınalyq betperdeler men qolǵaptardyń jáne t.b. bolýy.
Osy oraıda oblys turǵyndary turǵylyqty mekenjaıy nemese jumys ornyna jaqyn ornalasqan atalǵan nysandarǵa bara alady.
Áli de iri saýda-oıyn-saýyq ortalyqtarynyń, bazarlardyń, kınoteatrlardyń, monsha keshenderiniń, kompıýterlik klýbtardyń, fıtnes-ortalyqtardyń, turmystyq tehnıka dúkenderiniń, kıim-keshek dúkenderiniń jáne adamdar kóp jınalatyn basqa da oryndardyń qyzmetine tyıym salynǵan.
Atalǵan nysandar kezeń-kezeńimen ashylatyn bolady.
Aldaǵy kúnderi jergilikti atqarýshy organdardyń mobıldik toptary sanıtarlyq normalardyń saqtalýyn tekserip, árbir kásipkermen tıisti memorandýmdar jasasady. Eger sanıtarlyq normalar saqtalmaǵan jaǵdaıda, mobıldik toptar kásipkerlik nysanynyń qyzmetine tyıym salýǵa quqyly.
Budan basqa, turǵyndarǵa saǵat 10.00-den 12.00-ge deıin jáne saǵat 17.00-den 20.00-ge deıin úsh adamnan aspaıtyn (bir otbasy múshelerin qospaǵanda) turǵylyqty jerine jaqyn mańda qysqa merzimdi serýendeýge (30 mınýtqa deıin) ruqsat etiledi. Bul rette azamattarǵa basqa adamdarmen ara qashyqtyqty saqtaý qajet.
Jambyldyqtarǵa saǵat 07.00-den 10.00-ge deıin saıajaılarǵa shyǵýǵa bolady jáne keri qaıtýǵa saǵat 17.00-den 20.00-ge deıin ruqsat etiledi.
Taksı qyzmetiniń jumysy saǵat 06.00-den bastap bir saǵatqa, ıaǵnı saǵat 21.00-ge deıin uzartyldy.
