Jambyl oblysynda qar jınaý tehnıkasy jetispeı jatyr
TARAZ. QazAqparat – Jambyl oblysynyń polıtseıleri jol uıymdarynyń qysqy kezeńdegi jumysqa daıyndyǵyn tekserý barysynda qar jınaıtyn tehnıkanyń jetispeıtindigin anyqtady, dep habarlaıdy QazAqparat tilshisi oblystyq polıtsııa departamentiniń baspasózqyzmetine silteme jasap.
Jambyl oblysy PD Ákimshilik polıtsııa basqarmasy, tótenshe jaǵdaılar departamenti «QazAvtoJol» UK AQ Jambyl oblystyq fılıalymen jáne basqa da merdiger uıymdarmen birlesip avtomobıl joldarynyń qysqy maýsymǵa daıyndyǵyn tekserdi. Tekserý barysynda arnaıy tehnıkanyń bar-joǵy jáne onyń jaramdylyǵy, sondaı-aq jol belgileriniń, kóktaıǵaqqa qarsy materıaldyń qory zerdelendi.
«Oblys avtojoldaryn qysta kútip ustaýǵa qar jınaıtyn tehnıkanyń jasaqtalýy men daıyndyǵy shamamen 90 paıyzdy quraıtyny anyqtaldy. Ótken jyldardaǵy tájirıbe kórsetkendeı, bul kólik quraldarynyń qaýipsiz jáne úzdiksiz qozǵalysyn qamtamasyz etý úshin jetkiliksiz. Ásirese, boran kezinde. Tekserý barysynda anyqtalǵan kemshilikter boıynsha, ıaǵnı, qar jınaý tehnıkasynyń jetispeýshiligi týraly aqparat «QazAvtoJol» UK AQ-ǵa, sondaı-aq oblys ákimdigi organdaryna jiberildi. Al taıaý kúnderi jaýyn-shashyn men qar jaýý yqtımaldyǵy joǵary jáne aýa raıy jaǵdaıy kúrdelene túsetini boljanyp otyr», – dedi Jambyl oblysy PD Ákimshilik polıtsııa basqarmasy jol jáne tehnıkalyq ınspektsııasy bóliminiń bastyǵy Erjan Mananbaev.
Aıta ketý kerek, avtomobıl joldaryn qanaǵattanarlyqsyz ustaǵany jáne jol qozǵalysy qaýipsizdigin qamtamasyz etpegeni úshin jyl basynan beri 159 laýazymdy tulǵa ákimshilik jaýapkershilikke tartylǵan.
