Jambyl oblysynda qańtar oqıǵasynda urlanǵan qarý-jaraq arsenaly tabyldy

TARAZ. QazAqparat – Jambyl oblysy Polıtsııa departamentiniń qyzmetkerleri qańtar aıyndaǵy jappaı tártipsizdik barysynda urlanǵan qarý-jaraqtardy izdep-tabý jumystaryn kún saıyn júrgizedi, dep habarlaıdy QazAqparat tilshisi.

Bul joly polıtsııa qyzmetkerleri oblys ortalyǵynyń aýmaǵynda 20 qarý, 3 granata, patrondar, oq-dári, polıtsııa shlemderin, tize tósegishter men gaztutqyshtar taýyp, tárkiledi.

«Qarýlardyń qatarynda úsh Kalashnıkov avtomaty, eki Makarov tapanshasy, Saıga myltyǵy, tegis uńǵyly myltyqtar, revolver, travmatıkalyq tapansha, tegis uńǵyly myltyqtyń kesindisi, gazdy jáne jaryq-shý granatalary, túrli kalıbrli 363 patron boldy. Qarý-jaraqqa sot-ballıstıkalyq saraptama taǵaıyndaldy», - delingen vedomstvo málimetinde.

Jambyl oblysynyń Polıtsııa departamenti qarýdyń, oq-dárilerdiń, arnaıy quraldardyń ornalasqan jeri týraly habarlaǵan nemese olardy polıtsııaǵa óz erkimen tapsyrǵan adamdar, eger onyń basqa quqyq buzýshylyqtarǵa qatysy bolmasa, qylmystyq jáne ákimshilik jaýapkershilikke tartylmaıtynyn eske saldy. Qupııalylyqtyń saqtalatynyna kepildik berilip otyr.