Jambyl oblysynda iri jańa sport kesheni ashyldy
TARAZ. QazAqparat – Táýelsizdik kúni merekesine oraı Jambyl oblysy Qordaı aýdany Áljan ana aýylynda jańa sporttyq-saýyqtyrý kesheni ashyldy. Munda fýtbol, voleıbol, basketbol, erkin kúres, boks, taekvondo jáne dzıýdo sııaqty birneshe sport sektsııalary jumys isteıtin bolady,- dep habarlaıdy QazAqparat tilshisi.
Aýdany 1400 sharshy metrden asatyn sport kesheniniń qurylysyna «Samuryq-Qazyna»AQ – «Meniń Elim» áleýmettik ınvestıtsııalar baǵdarlamasy aıasynda «Samruk - Kazyna Trust» áleýmettik jobalardy damytý qory qarajat bólgen. Munda túrli sporttyq is-sharalar, aýdandyq jáne oblystyq deńgeıdegi jarystar, sondaı-aq oqý-jattyǵý jıyndary ótkizilmek. Keshen úlken arena, ámbebap zal, boks jáne kúres zaldary jáne 4 kıim aýystyratyn bólmelermen qamtylǵan.
«Memleket basshysy buqaralyq sportty damytýǵa úlken kóńil bólýde. Oblysymyzda 13 dene shynyqtyrý-saýyqtyrý kesheniniń qurylysy júrýde desek, onyń tórteýi Qordaı aýdanynyń aýyldarynda júzege asýda. Áljan ana aýylynda jańa sport kesheniniń ashylýy jergilikti jastardyń, jalpy turǵyndardyń bos ýaqytyn tıimdi ótkizýge, salaýatty ómir saltyn ustanýǵa, yqpal etedi dep senemin. Endi olar aýdan ortalyǵyna barýǵa artyq aqsha men ýaqyt shyǵyndamaı-aq, súıikti sport túrimen óz aýyldarynda shuǵyldanatyn bolady», - dedi Berdibek Saparbaev aýyl turǵyndaryn aıtýly oqıǵamen quttyqtap.
Sondaı-aq, sport kesheniniń ashylý saltanatyna osy aýdannyń týmasy, IBA nusqasy boıynsha kásipqoı bokstan álem chempıony, Azııa chempıony, Qazaqstannyń birneshe dúrkin chempıony Marat Mázimbaev arnaıy qatysyp, jaqyn bolashaqta osy keshenniń qabyrǵasynan Olımpıada jáne álem chempıondary shyǵatynyna, olardyń qurmetine táýelsiz Qazaqstannyń ánuranyn áýeleıtinine senim bildirdi.
Barlyq sport zaldary kerekti qural-jabdyqtarmen, onyń ishinde boks rıngimen, kúres matrastary jáne tósenishterimen, grýsha jáne basqa da trenajerlarmen jabdyqtalǵan. Munda jergilikti balalar men jasóspirimder sport mektebiniń 120 qatysýshysy 6 jattyqtyrýshymen birge shynyǵatyn bolady.
Aıta keteıik, ǵımarattyń múmkindigi shekteýli adamdarǵa da qol jetimdiligi qarastyrylyp, pandýstar jáne arnaıy dárethanalar salynǵan. Sonymen qatar, munda alǵashqy medıtsınalyq kómek kórsetýge arnalǵan dári-dármektermen qamtylǵan medıtsınaly kabınet te qarastyrylǵan. 
Bul «Samruk-Kazyna Trust» áleýmettik jobalardy damytý qorynyń Jambyl oblysynda iske asyrǵan alǵashqy jobasy emes desek, buǵan deıin 2020 jyly óńirde úsh ámbebap sport alańy ashylǵan.
