Jambyl oblysynda ımamdar men meshit qyzmetkerleri jappaı vaktsına salǵyzyp jatyr
Búgin de aımaqtyń bas ımamy bastaǵan bir top din ókilderi qalalyq 5-shi emhanada ekpe aldy. Jalpy óńirde 319 meshit bolsa, onda 450 adam jumys isteıdi. Qazir olardyń 80 paıyzy vaktsına alǵan. Deni QazVac ekpesin saldyrýǵa nıetti.
«Bul otandyq ónimge kórsetken qoldaýymyz ári senim artýymyz», - deıdi olar.
Oblysta qaýipsizdik maqsatynda bas sanıtarlyq dárigerdiń qaýlysymen juma namazy oqylmaıtyn bolyp sheshildi. Jalpy óńir boıynsha 18 jastan joǵary 582 myń adamdy koronavırýs ınfektsııasyna qarsy vaktsınatsııalaý josparlanǵan. Qazirgi tańda ol 50 paıyzǵa oryndalyp otyr.
«Halyqpen kóbirek ımamdar jumys isteıdi. Sondyqtan ımamdar qaýymyna da kóbirek nasıhat júrgizip jatyrmyz. Sebebi ártúrli jaǵdaı bolady. Byltyr ımamdardyń arasynda biraz din qyzmetkerleri dúnıeden ozdy. Sondyqtan da biz ǵylymnyń jetken jetistigine amal eteıik dep ekpe saldyryp otyrmyz. Sharıǵatta da bul ekpe saldyrýdy quptaıdy», - deıdi Jambyl oblysynyń bas ımamy Beıbit Myrzageldıev.
