Jambyl oblysynda halyqpen Biryńǵaı baılanys ortalyǵy qurylady
TARAZ. QazAqparat – Jambyl oblysynyń ákimi Berdibek Saparbaev óńir kásiporyndarynyń jumysymen tanysýdy jalǵastyrýda, dep habarlaıdy QazAqparat óńir ákimdiginiń resmı saıtyna silteme jasap.
Bul joly aımaq basshysy «Jardem-109» monıtorıng jáne jedel áreket etý aqparattyq ortalyǵynda bolyp, «Taraz bylǵary aıaqkıim» JShS fabrıkasynda, «Ta-Mak» JShS jáne «BM» óndiristik kásipornyna bardy.
Taraz qalasy ákimdiginiń «109» biryńǵaı dıspetcherlik qyzmeti oblys ortalyǵynyń tynys-tirshiligine qatysty ártúrli máseleler boıynsha azamattardyń ótinishteri boıynsha jedel áreket etý maqsatynda qurylǵan. Alaıda, bul qyzmet búginde óz mindetin tolyqtaı atqaryp otyrǵan joq. Qalanyń kommýnaldyq jáne basqa da salalaryndaǵy máselelerge qatysty azamattardyń kóptegen ótinishteri naqty júıeli jumystyń joqtyǵy saldarynan sheshilmeı keledi. Bul oraıda merzimi ótken ótinishterdiń kóp bolýy bul qyzmettiń tıimdiliginiń tómendigin kórsetedi. Sondaı-aq, azamattarǵa beriletin jaýaptardyń sapasy da kóńil kóńshitpeıdi.
Osyǵan baılanysty 109 qyzmetin oblys ákimi apparatynyń qaramaǵyna berý jáne onyń bazasynda búkil oblysty qamtıtyn Biryńǵaı baılanys ortalyǵyn qurý máselesi óz sheshimin tappaq.
«Bul ortalyqta oblystaǵy jumystardyń ahýaly týraly barlyq aqparat shoǵyrlanýy tıis. Osy rette qazirgi ýaqyttaǵy koronavırýstyq ınfektsııaǵa qarsy áreket etý boıynsha tolyq aqparattyq baza qurý qajet. Sondaı-aq, munda barlyq áleýmettik tólemder, memlekettik baǵdarlamalardy iske asyrý jáne jergilikti atqarýshy organdar qyzmetiniń basqa da salalary boıynsha baza qalyptastyrylady. Ortalyq qyzmetkerleri azamattardyń kelip túsken ótinishterine jedel nazar aýdaryp jáne olar tarapynan týyndaǵan máselelerdi sheshý joldaryn qarastyrýǵa mindetti», - dep atap ótti oblys ákimi.
Budan soń aımaq basshysy «Taraz bylǵary aıaqkıim» JShS-ǵa bardy. Bir kezderi bul kásiporynnyń ónimi tek Qazaqstanda ǵana emes, shetelde de tanymal bolatyn. Alaıda, keıingi ýaqytta zaýyt úlken qıyndyqtardy bastan ótkerdi. Búginde munda áskerı qyzmetshiler men jumysshylarǵa arnalǵan báteńkeler daıyndalady. Zaýyt qaryzdary jyl sanap ósýde. Kásiporyn basshylyǵyna tutynýshylardyń suranysyna saı taýarlardyń jańa túrlerin shyǵarý múmkindigin qarastyrý kerektigi usynyldy.
Sondaı-aq, Jambyl aýdanynyń Jalpaqtóbe aýylynda ornalasqan «BM» óndiristik kásipornynda da jumystardyń ilgerileýi baıqalýda. JShS bas dırektory Sultan Mahmadovtyń aıtýynsha, búginde zaýyt qurama jem óndirýge mamandanǵan. Al jýyrda koronavırýstyń taralýyna baılanysty munda antıseptıkter shyǵaryla aldaǵy josparlarymen de bólisti.
Berdibek Saparbaev kásiporyn qyzmetin oń baǵalap, onyń damýyna barynsha qoldaý kórsetýge ýáde berdi.
