Jambyl oblysynda halyqqa qaýip tóndiretin 14 sý qoımasy bar

TARAZ. QazAqparat – Jambyl oblysy aýmaǵynda halyqqa qaýip tóndiretin 14 sý qoımasy bar. Bul týraly óńirlik kommýnıkatsııalar qyzmeti alańynda ótken brıfıngte oblystyq tótenshe jaǵdaılar departamentiniń bastyǵy, azamattyq qorǵaý polkovnıgi Ermek Mombaev aıtty, dep habarlaıdy QazAqparat tilshisi.

Jalpy oblys boıynsha birneshe eldi mekenge qaýipti sanalatyn sý qoımalarynyń sany 14-ti quraıdy. Olardyń negizgileri - «Teris-Aşybulaq», «Tasótkel», «Qaqpatas», «Aqkól», «Yntaly», «Qaraqońyz» jáne Qyrǵyzstandaǵy «Kırov» sý qoımasy.

Atalǵan sý qoımalarynyń bógetteri buzylǵan jaǵdaıda 234 myńnan astam turǵyny bar 72 eldi mekendi sý basýy múmkin.

Ermek Mombaevtyń aıtýynsha, tabıǵattyń tosyn minez tanytýynan bolatyn tasqyndar men erigen qar sýlary kesirinen taǵy 38 eldi mekendi sý basýy múmkin.

Sý basýǵa sebep retinde Shý, Talas, jáne Asa ózenderiniń arnasynan asýy ıaǵnı sý deńgeıiniń kóterilýi bolmaq.

Al, taý bókterindegi eldi mekenderge erigen qar men jańbyr sýlary qaýip tóndirmek.

«Sý tasqyny qaýipin azaıtý maqsatynda «Sý tasqyny qaterleriniń aldyn alý jáne joıý jónindegi 2017-2020 jyldarǵa arnalǵan sharalar kesheni» jol kartasy bekitilgen. Ol boıynsha oblystaǵy eldi mekenderdi sý tasqynynan jáne erigen sýlardan qorǵaý úshin 26 ýchaskede jaǵalaýdy qorǵaý jumystaryn júrgizý josparlandy»,-dedi spıker.

Bul baǵytta bólingen qarjy da qomaqty. Máselen, 7,442 mlrd teńgege 3 nysan respýblıkalyq bıýdjet esebinen jóndelse, qalǵan 30 nysanǵa 356 mln teńge jergilikti bıýdjetten jumsalǵan.

Aıta keteıik, aımaqta sońǵy 5 jylda sý tasqyny men jerasty sýynyń kóterilýine baılanysty 7 oqıǵa tirkelgen.

Saldarynan Qordaı, Jambyl, T.Rysqulov aýdandarynda 104 turǵyn úı aýlasy, 25 turǵyn úı ǵımaraty sý astynda qalǵan bolatyn.

Al bıylǵy jyldyń 12 qańtar kúni Maıtóbe aýylynda erigen qar sýynan tasqyn boldy.

«Taraz-Qarataý» oblystyq mańyzy bar avtojoldyń 75 shaqyrymynda bolǵan oqys oqıǵa eldi-mekenge qorqatyndaı qaýip tóndirgen joq. Oqıǵanyń saldary joıyldy.