Jambyl oblysynda geroın kontrabandasynyń joly kesildi

TARAZ. QazAqparat - Jambyl oblysynda «Qarasora-2023» jedel-aldyn alý is-sharasy bastaldy. Іs-sharanyń birinshi kúni Polıtsııa departamenti Esirtki qylmysyna qarsy is-qımyl basqarmasynyń qyzmetkerleri Jambyl oblysy UQK Shekara qyzmeti departamentimen birlesip Qyrǵyz Respýblıkasynan Qazaqstanǵa geroın jetkizý arnasynyń jolyn kesti, dep habarlaıdy QazAqparat tilshisi.

Polıtseıler buryn esirtki saqtaǵany úshin sotty bolǵan Almaty oblysynyń turǵynyn ustap, odan salmaǵy 700 gramnan asatyn «geroın» esirtki zatynyń 2 polıetılen paketin tárkiledi. Kúdikti áıel óz kinásin tolyq moıyndady.

16 mıllıon teńge bolatyn tárkilengen partııa 1500-den astam adamnyń ómirin saqtap qalýǵa múmkindik beredi.
«Qazirgi ýaqytta atalǵan derek boıynsha QR Qylmystyq Kodeksi 286-babynyń 4-bóligi, atap aıtqanda, asa iri mólsherde esirtki kontrabandasy jáne 297-bóligi 3-bóligi, ıaǵnı, asa iri mólsherde esirtki zattaryn ótkizý maqsatynda zańsyz saqtaý boıynsha sotqa deıingi tergep-tekserý amaldary bastaldy.
Bul baptyń sanktsııasy kúdiktiniń múlki tárkilenip, 10 jyldan 20 jylǵa deıingi merzimge bas bostandyǵynan aıyrý ne ómir boıyna bas bostandyǵynan aıyrý túrindegi jazany kózdeıdi», – dep habarlady Jambyl oblysy PD EQQІB bastyǵy polıtsııa podpolkovnıgi Álim Bajyqbaev.
Buǵan deıin Jambyl oblysynda 4 aıda 528 keli esirtki zattary tárkilengenin jazǵan bolatynbyz.