Jambyl oblysynda gaz ballony jarylyp, eki adamdy kúıik shaldy
TARAZ. QazAqparat – Jambyl oblysynda jol boıyndaǵy ǵımaratta gaz balony jarylyp, kúıik shalǵan eki adam aýyr jaǵdaıda aýrýhana jatqyzyldy,- dep habarlaıdy QazAqparat tilshisi.
Oqıǵa týraly oblystyq tótenshe jaǵdaı departamentiniń baspasóz qyzmeti habarlady.
«25 jeltoqsan kúni saǵat 16-36-da Baızaq aýdanynda, «Almaty-Tashkent» tas jolynyń 597 shaqyrymynda, jol boıynda qurylysy bastalǵan jem zaýytynyń jumysshylarǵa arnalǵan ashana retindegi beıimdelgen garaj bokstarynda gaz ballony (50l) jaryldy. Saldarynan tutanǵan órt 150 sharshy metr alańdy sharpydy. Jarylys saldarynan bokstardyń beton qabyrǵasy men 2 ishki kirpish qalqandary qırady. Oqıǵa nátıjesinde 1966 jáne 1960 jyly týǵan azamattar kúıik alyp, aýyr jaǵdaıda aýrýhanaǵa jatqyzyldy. Órt 17 saǵat 02 mınýtta aýyzdyqtalyp, 17 saǵat 22 mınýtta sóndirildi»,-delingen vedomstvo habarlamasynda.
Oqıǵa ornynda TJ departamentiniń 22 qyzmetkeri jáne 6 birlik tehnıka jumyldyrylǵan. Sondaı-aq, órttiń sebebin anyqtaý úshin oqıǵa ornyna jyljymaly órt-tehnıkalyq zerthanasy jóneltilgen.
